कास्कीका नर्सहरु आन्दोलनमा

पोखरा । कास्कीका विभिन्न स्वास्थय संस्थाहरुमा कार्यरत नर्सहरु आन्दोलित भएका छन्। नेपाल नर्सिङ्ग संघको केन्दीय कार्यक्रम अनुसार उनीहरुले आन्दोलनमा एकेबद्धता जनाएका हुन्। केन्दीय संघले विभिन्न ११ सुत्रीय माग राखेर गतहप्तादेखि केन्द्रमा आन्दोलन गर्दै आएको छ। स्वास्थ्य मन्त्रालयले उनीहरुका मागको सुनुवाइ नगरेपछि पूर्व कार्यतालिका अनुसार सोमबारदेखि तीन दिनसम्म उनीहरुले १० देखि १ बजेसम्म ३ घन्टाका लागि ड्युटी छाड्ने घोषणा गरेका हुन्।यी तीन दिनभित्र पनि माग पूरा नभए ४, ५ र ६ गते सबै अस्पताल र शैक्षिक संस्थामा ८ देखि ४ बजेको सिफ्टमै ड्युटी नजाने र अझै माग पूरा नभए माघ ७ गते २४ घन्टा नै ड्युटी छाडेर स्वास्थ्य मन्त्रालयमा धर्ना दिने कार्यक्रम छ।
केन्द्रीय निर्णय अनुसार आफूहरु पनि आन्दोलनमा उत्रिएको नेपाल नर्सिङ संघ कास्कीका अध्यक्ष क्षेत्रकुमारी रोकाले बताइन् । कास्कीमा रहेको नर्सहरु पनि केन्द्रको आन्दोलनलाई समर्थन गर्न हिजो सोमबारबाट विहान १० बजेदेखि दिउँसो एक बजेसम्म तीन घण्टा कामकाज नगरेको अध्यक्ष रोकाले बताइन् । इमर्जेन्सीबाहेक अन्य सवै विभागमा आन्दोलनरत नर्सहरुले तीन घण्टा काम नगर्दा सेवाग्राहीहरुलाई प्रभाव परेको विरामीका आफन्तले गुनासो गरेका छन् । कास्कीमा निजी तथा सरकारी स्वास्थ्य संस्थामा करिब ५ सय नर्सहरु रहेका छन् ।