पोखरामा आयोजित शिविरमै आङखस्ने समस्या भएका महिला भेटिए

पोखरा, १९ माघ । नेपालको दोस्रो ठूलो राजधानी र मानब सूचांकको आधारमा समेत साक्षरता दर उच्च रहेको पोखरामा महिलाहरुमा आङ खस्ने समस्या देखिएको छ ।
पोखरा लेखनाथ महानगर पालिकाले पोखरामा आयोजना गरेको स्वास्थ शिविरमा आङ खस्ने समस्या भएका विरामी भेटिएका हुन् ।
महानगरपालिका र जनप्रिय अस्पतालद्धारा संयुक्तरुपमा आयोजित शिविरमा आएका महिलाहरुको परिक्षणमा आङ खस्ने समस्या देखिएको स्वास्थ्य कर्मि गिता ढकालले बताइन् । महिलाहरुको स्तन तथा पाठेघरका समस्या सम्बन्धी सचेतना तथा स्क्रिनीङ्ग जाँच शिविरमा आङ खस्ने समस्या भएका ६ जना महिलाहरु भेटिएको उनले जानकारी दिइन्।
ढकालका अनुसार शिविरमा उपचारार्थ आएका २ जना महिलाहरुको भिआए टेस्ट गर्दा पोजेटिभ देखिएकोछ। बिहीबार सम्पन्न शिविरमा पोखराका विभिन्न ठाउँबाट आएका १ सय ७२ जना महिलहरुले परिक्षण गराएका थिए ।
शिविरको उद्घाटन गर्दै पोखरा लेखनाथ महानगर पालिकाकी उपमेयर मन्जु गुरुङले महिलाहरुमा पाठेघर र स्तनको क्यान्सर बढि हुने गरेको बताउदै बेलैमा सचेत रहनु पर्ने बताइन् । उनले यस्ता शिविरहरु अन्य ठाउँमा पनि राख्नु पर्ने बताइन् ।
कार्यक्रममा पोखरा स्वास्थ्य विज्ञान प्रतिस्ठानका बरिष्ठ बालरोग विशेषज्ञ तथा जनप्रिय अस्पतालका डाक्टर यज्ञराज सिग्देलले महिलाहरुले बालबालिकालाई स्तनापान नगराउदा बढि मात्रामा स्तनको क्यान्सर हुने गरेको बताए ।
उनले ६ महिना सम्म बालबालिकालाई स्तनपान गराउन सुझाब दिए । उनले जनप्रिय अस्पतालमा आगामी दिनमा पनि यस्ताखाले शिविर राख्ने बताए ।
शिविरमा स्त्री रोग विशेषज्ञ पे्रम पगेनी र अन्य स्वास्थ्यकर्मिहरुले परिक्षण गरेका थिए । कार्यक्रम पोखरालेखनाथ महानगर पालिका वडा नम्बर ८ का वडा अध्यक्ष रुद्र बरालको अध्यक्षतामा भएको थियो ।