होलीको नाममा उच्श्रृङखल क्रियाकलाप गर्नेलाई प्रहरीले सार्वजनिक अपराध मुद्धा चलाउने,मापासे जाँच दिनभर

पोखरा १६ फागुन । होलीमा जथाभावी रंग हान्ने तथा उच्श्रृङखल क्रियाकलाप गर्नेलाई कास्की प्रहरीले सार्वजनिक अपराध अन्तर्गत मुद्धा चलाउने भएको छ । रंगहरुको पर्व होलीलाई सद्भावपूर्ण मनाउन आग्रह गरिने र कोही कसैले अर्कालाई दखल पुग्ने गरी रंग तथा लोला प्रहार गरे प्रहरीले तुरुन्त पक्राउ गरी सार्वजनिक अपराध अन्तर्गत मुद्धा चलाउने कास्की प्रहरी प्रवक्ता खड्क बहादुर खत्रीले वताए ।
कास्कीको शहरी इलाकामा मात्र नभइ ग्रामीण भेगमा पनि जो कोहीले जथाभावी रंग हान्ने काम गरेको पाइए तुरुन्त प्रहरीले पक्राउ गरी कारबाही गर्ने खत्रीले वताए । खत्रीका अनुसार विशेष गरी कास्की प्रहरीले कास्कीको मुख्य पर्यटकीय गन्तब्य लेकसाइडमा सादा पोषाकका प्रहरीहरु परिचालन गरी उच्श्रृङखल गतिविधी गर्नेलाई तुरुन्त नियन्त्रणमा लिइनेछ ।
त्यसैगरी होलीमा हुन सक्ने दुुर्घटनालाई मध्येनजर गरी कास्कीमा होलीको दिन बिहीबार दिउसोदेखिनै मादक पदार्थ सेवन(मापसे) चेकजांच हुने समेत प्रहरी प्रवक्ता खत्रीले जानकारी दिए ।