देउवाको जितलाई पार्टीको बर्बादी भन्दै पौडेल तीन दिन क्रिया बस्ने घोषणा

नेपाली काङ्ग्रेस संसदीय दलको नेता चुनिएपछि सभापति शेरबहादुर देउवाका अनुयायीबीच खुशीयाली छाएको छ । पार्टीले चुनावमा ब्यहोरेको लज्जास्पद हार र भावी दिनमा यसले भोग्नुपर्ने दुर्गतिका सम्भावनामाथि चिन्ता वा चिन्तनरहित देउवा समूह विजयोन्मादमा रम्दै गर्दा पार्टीप्रति चिन्तित काङ्ग्रेस कार्यकर्ताहरूमा भने निराशा छाएको पाइएको छ ।

आज भएको संसदीय दलको निर्वाचन परिणामअनुसार देउवा विजयी बनेको खबर सुन्नेवित्तिकै काङ्ग्रेसका समर्पित कार्यकर्ता चितवननिवासी लेखनाथ पौडेलले पार्टी बर्बाद हुन लागेको भन्दै गहिरो चिन्ता प्रकट गरेका छन् । उनले यस परिघटना आफ्नो लागि ठूलो शोकको विषय भन्दै शोकमा परेको आफू अब ‘कृयाकर्म’मा लाग्ने घोषणा गरेका छन् ।

‘जुठो बार्न’ लागेका पौडेलले चितवनको काङ्ग्रेस पार्टी कार्यालयमै कृया बस्ने बताएका छन् । यदि त्यहाँ बाधा–अवरोध उत्पन्न गरिए भरतपुर–३ बाह्रघरेस्थित आफ्नै निवासमा भए पनि कृयामा बस्ने जानकारी उनले दिए ।

यसै क्रममा नेपाली कांग्रेसका लोकप्रिय नेता चन्द्र भण्डारीले देउवा संसदीय दलको नेता बनेको सन्दर्भमा आफ्नो फेसबुक वालमा स्ट्याटस लेख्दै अर्थपूर्ण प्रतिक्रिया दिएका छन् । उनले भनेका छन्, ‘संसदीय दलको नेता शेरबहादुर देउवा, कुनै नयाँ कुरा होइन ! आजसम्म पार्टी सभापति, नेता उहाँ न हो ! विभेदपूर्वक समानुपातिकको भीड़ जम्मा गरेर आफुलाई भोट हलाउनु ठुलो कुरा होइन । ठुलो कुरा उहाँको नेतृत्वमा पार्टी कुन स्थानमा छ भन्ने हो । महत्वपूर्ण सवाल दाशहरुको भेलाले युद्ध जित्न सकिँदैन ! शुभकामना उहाँका केही सहयोगीलाई… जसले विगतमा पार्टीलार्इ चुनाव हराउन सहयोग पुर्याए । अब पार्टीलाई अगाडी बढाउन सहयोग गरुन् !!’ghatanarabichar