सभामुखमा महरा निर्विरोध, औपचारिक घोषणा भोलि

काठमाडौं, २५ फागुन । प्रतिनिधि सभाको सभामुखमा माओवादी नेता कृष्णबहादुर महरा निर्विरोध निर्वाचित हुने पक्का भएको छ । सभामुखमा महराको मात्रै उम्मेदवारी परेपछि उनलाई निर्विरोध निर्वाचित भएको घोषणा गरिने छ ।

सभामुखमा महरा निर्विरोध निर्वाचित भएको घोषणा भने भोलि बस्ने संसद बैठकबाट मात्रै गरिने बताइएको छ । संसद सचिवालयका प्रवक्ता डा. भरत गौतमका अनुसार शनिबार बस्ने संसद बैठकमा प्रस्तावकले प्रस्ताव र समर्थकले समर्थन गरेपछि संघीय संसदले सभामुख पदमा एक जनाको मात्रै उम्मेदवारी परेको जानकारी गराउने र बैठकको अध्यक्षता गरेका व्यक्तिले निर्विरोध भएको घोषणा गर्नेछन् ।

वाम गठबन्धनबीचको सहमति अनुसार महरा माओवादीका तर्फबाट सभामुखको उम्मेदवार बनेका हुन् । सभामुखका लागि शनिबार संसदमा मतदानको कार्यतालिका भएपनि एक जनाको मात्रै उम्मेदवारी दर्ता भएपछि उक्त नाम निर्वाचित भएको घोषणा गरिने छ ।