१६ वर्षीया किशोरीको सामूहिक बलात्कार,४ जना पक्राउ

पर्वत १६ चैत । पर्वतमा एक किशोरीको सामुहिक बलात्कार भएको छ । पर्वतको छमर्केमा मेला भर्न गएर फर्किदै गरेकी १६ बर्षीय किशोरीलाई लिफ्ट दिने बाहानामा होटल पुर्‍याई सामुहिक बलात्कार गरिएको हो । सँगै रहेकी किशोरी भागेर प्रहरीलाई खबर गरेपछि घटनामा संलग्न पक्राउ परेका हुन् ।

पर्वत प्रहरीका अनुसार बलात्कारमा संलग्न कुश्मा-१, सहस्रधाराका २३ वर्षीय शिशिर क्षेत्री, कुश्मा-५, वडागाउका १७ का सौगात शर्मा पौडेल र कुश्मा-५ मेलमिलाप चोकका सुजल श्रेष्ठलाई नियन्त्रणमा लिइएको हो । होटल सञ्चालक वाग्लुङ-१२, वलेवा अमलाचौरका ३८ वर्षीय शेरबहादुर हमाललाई पनि प्रहरीले नियन्त्रणमा लिएको छ ।

प्रहरीका अनुसार बिहीबार राति पीडित युवतीसँगै अर्की युवती बाग्लुङ मेलामा सहभागी भएर पर्वत फर्किन गाडी कुरिरहेका थिए । त्यहीँ क्रममा दुई वटा मोटरसाइकल उनीहरुको अगाडि आइपुग्छ र कुश्मा जाने भए लिफ्ट दिन्छौं भन्छन् । तर, कुश्मा नगरपालिका(४, छमर्केमा ‘न्यू सेवा गेष्ट हाउस’ लान्छन् । त्यहाँ उनीहरुले अर्का एक जना साथीलाई पनि बोलाउँछन् ।

त्यहाँ उनीहरुले मदिरा सेवन गरी युवतीलाई पनि खुवाएर बलात्कार गर्छन् । तर सँगै रहेकी अर्की युवती भाग्न सफल भई प्रहरीलाई खबर गरेपछि घटना बाहिर आएको हो ।उनीहरुमाथि जबरजस्तीकरणी मुद्दा अन्तर्गत म्याद थप गरी विस्तृत अनुसन्धान थालिएको जिल्ला प्रहरी कार्यालय पर्वतले जनाएको छ ।