कानुन निर्माण संसदको पहिलो प्रथामिकता ः अध्यक्ष तिमिल्सिना

शुभेच्छा न्यूज
पोखरा,२६ वैशाख । राष्ट्रियसभा अध्यक्ष गणेशप्रसाद तिमिल्सिना र नेपालका लागि जापानका राजदूत माशाशी ओगावाबीच शिष्टचार भेट सम्पन्न भएको छ ।
आफ्नो साढे चारवर्षको कार्यकाल सम्पन्न गरी स्वदेश फर्कन लाग्नुभएका राजदूत ओगावाले बुधवार अध्यक्ष तिमिल्सिनाको सिंहदरबारस्थित सचिवालयमा भेटघाट गरेका हुन्। भेटका क्रममा अध्यक्ष तिमिल्सिनाले कार्यकाल सम्पन्न गरी स्वदेश फर्कन लागेकोमा राजदूत ओगावालाई बधाई व्यक्त गरे।
तिमिल्सिनाले यो अवधिमा नेपालले भूकम्प, संविधान निर्माण र नाकाबन्दीको सामना गरेको बताउँदै उक्त क्रममा राजदूतमार्फत जापानबाट प्राप्त सहयोगको प्रशंसा गरे। त्यसैगरी जापान सरकारले पूर्वाधार निमार्ण, शिक्षा, स्वास्थ्य लगायतका क्षेत्रमा गरेको सहयोगले नेपाल लाभाम्वित भएको बताए।
संविधानअनुसार बन्नुपर्ने सयभन्दा बढी कानुन निमार्णमा प्रथामिकतासाथ संसद जुटिरहेको र देश अब समृद्धितर्फ उन्मुख भएकाले त्यसका लागि मित्रराष्ट्रहरुको सहयोग र समर्थन कायम रहने विश्वास व्यक्त गरे। नेपाल र जापानबीच सुमधुर सम्बन्ध रहेको स्मरण गर्दै अध्यक्ष तिमिल्सिनाले दुई देशबीच संसदमैत्री समूह गठन गरी सांसदहरुको भ्रमण तथा अनुभव आदानप्रदानमा पहल गर्ने बताए।
जापानका राजदूत ओगावाले संविधानअनुसार बनेको सबै संरचनाको निर्वाचन सम्पन्न गरी कार्यन्वयतर्फ लागेकाले नेपालले स्थिरता र समृद्धीको लक्ष्य हासिल गर्ने बढ्ने विश्वास व्यक्त गरेका थिए।