पोखराको लेकसाइडबाट ८६ हजार नगद सहित ७ जुवाडे पक्राउ

पोखरा । जिल्ला प्रहरी कार्यलय कास्कीले शनिवार पोखराबाट ७ जना जुवाडे पक्राउ गरेको छ। पोखरा महानगरपालिका ६ लेकसाईड स्थित होटल लेक डायमण्डबाट तास खेली रहेको अवस्थामा ७ जनालाई नगद सहित पक्राउ गरिएको प्रहरीले जनाएको छ ।
उनीहरुको साथबाट ४ बुक तास सहित नगद ८५ हजार ६ सय ७५ रुपैया बरामद गरिएको छ । पक्राउ पर्नेमा ईलाम पशुपति नगर ४ घर भई पोखरा ६ लेकसाईड बस्ने ४८ बर्षीय होटल सञ्चालक मनकुमार मुखिया, मोरङ पथरी शनिस्चरे नगरपालिका ४ घर भई लेकसाईड बस्ने वर्ष ४३ का विरेन्द्र अधिकारी, पोखरा लेखनाथ ६ बैदामका ४२ बर्षीय देव श्रेष्ठ, मकवानपुर मनहरी ३ घर भई पोखरा लेखनाथ ६ लेकसाईड बस्ने ४० बर्षीय चन्द्र लामा, पोखरा लेखनाथ २६ का ३६ बर्षीय विरेन्द्र दाहाल, मकवानपुर हेटौडा ९ घर भई हाल पोखरा लेखनाथ ६ बस्ने वर्ष ३४ का लक्ष्मण लामा र सुनसरी धरान १५ घर भई पोखरा लेखनाथ ६ बस्ने ३७ बर्षीय अमित तामाङ छन् । प्रहरीले उनीहरुलाई जुवा मुद्धामा कारवाही प्रक्रिया अघि बढाइएको जनाएको छ ।