नेपाल विद्यार्थी संघद्धारा पोखरामा पेट्रोलियम पदार्थमा भएको मूल्यबृद्धि विरुद्ध धर्ना

शुभेच्छा न्यूज

पोखरा. नेपाल आयल निगमले पटक पटक गरेको पेट्रोलियम पदार्थको मूल्य बृद्धि फिर्ता लिन माग गर्दै नेपाल विद्यार्थी संघ कास्कीले जिल्ला प्रशासन कार्यालय कास्कीको गेट अगाडि एकघण्टा कालो झण्डा प्रदर्शन गरी मूल्यवृद्धि फिर्ता लिन सरकारलाई खबरदारी गरेको छ ।

नेविसंघ केन्द्रीय कार्यक्रम अनुसार मूल्यबृद्धिको चरणवद्ध विरोध कार्यक्रम अनुसार मंगलबार नेपाल अधिराज्यभरी जिल्ला प्रशासन मार्फत प्रधानमन्त्रीलाई ज्ञापनपत्र बुझाएको थियो भने आज बुधबार जिल्ला प्रशासन कार्यालय अगाडि धर्ना दिइएको नेविसंघ कास्की नेता राजेन्द्र क्षेत्रीले बताए ।

उक्त अवसरमा नेविसंघ कास्कीका सभापति विकास थापाले कोपी ओली सरकार चुनाव अघि जनतालाई झुटो आश्वासन बाँडी सत्तामा पुगेपछि जनतालाई ढाड सेक्नेगरी पेट्रोलियम पदार्थ लगायत दैनिक उपभोग्य वस्तुमाथि चरम मूल्यबृद्धि गरेकोप्रति आक्रोश व्यक्त गरे ।

जहानियाँ राणा शासन राजा महाराजाको समेत विरोध गर्न पछि नपरेको नेविसंघ ओली सरकारको अगाडि कहिल्यै नझुकी जनताको हक र अधिकारको लागि जीवनपर्यन्त लड्ने र सरकारले तत्काल मूल्यबृद्धि फिर्ता नलिए आगामी दिनमा थप संघर्षका कार्यक्रम गर्ने बताए ।