रसियालाई हराउँदै उरुग्वे ए को विजेता

गोलकिपर फर्नान्डो मुस्लेराले लगातार तेस्रो खेलमा क्लिनसिट राख्दा उरुग्वे आयोजक रसियालाई पराजित गर्दै समूह ए को विजेता बनेको छ।

रसियामा भइरहेको विश्वकप अन्तर्गत समूह चरणको अन्तिम खेलमा उरुग्वेले १० खेलाडीमा झरेको रसियालाई ३-० ले हरायो। उरुग्वेका लागि लुइस सुआरेजले १०औँ मिनेटमै गोल गर्दै अग्रता दिलाएका थिए। २३औँ मिनेटमा रसियाका डेनिस चेरिसोभले आतमघाती गोल गरेपछि उरुग्वेले २-० को अग्रता बनायो।

त्यसपछि आयोजकका लागि खेल झन् सुखद हुन सकेन। ३६औँ मिनेटमा इगोर स्मोलनिकोभ रातो कार्ड खाँदै मैदान बाहिरिएपछि रसिया १० खेलाडीमा झर्‍यो। त्यसपछि रसियाले एक खेलाडी कम रहेर खेल्नुपर्‍यो। त्यसको फाइदा उठाउँदै उरुग्वेका लागि एडिनसन कभानीले ८८औँ मिनेटमा गोल गरे।