पोखरा महानगरको तेस्रो नगरपरिषदद्धारा ‘लेखनाथ ’ हटाउने प्रस्ताव सर्वसम्मत पारित

शुभेच्छा न्यूज
पोखरा । पोखरा लेखनाथ महानगरपालिकाबाट लेखनाथ हटाउने प्रस्ताव सर्वसम्मत पारित भएको छ । मंगलबारको पोखरा लेखनाथ महानगरपालिकाको तेश्रो नगर सभाले लेखनाथ हटाउने प्रस्ताव सर्वसम्मत पारित गदै सकिएको छ ।

पारित प्रस्तावलाई अव कार्यपालिका बैठकले प्रदेश नम्वर चार सरकारलाई लेखनाथ हटाउन सिफारिस गर्ने छ । प्रदेशले संघीय सरकारलाई सिफारिस गर्ने र मन्त्रीपरिषदबाट पास भएपछि राजपत्रमा प्रकाशित भएपछि नाम परिवर्तन हुने छ ।

सोमबार एमालेका सचेतक तथा पोखरा १९ का वडा अध्यक्ष शोभामोहन पौडेलले सभामा नाम परिमार्जनको प्रश्ताव पेश गरेका थिए भने उनको प्रस्तावलाई काँग्रेस सचेतक तथा पोखरा ९ का अध्यक्ष रामराज लामिछानेले समर्थन गरेका थिए। लेखनाथ हटाउने प्रस्तावमाथि मंगलबार नगरसभामा ब्यापक छलफल भएको थियो । छलफलमा ४० जना नगर सभाषद्ले लेखनाथ हटाउने प्रस्तावका बारेमा आआफनो विचार राखेका थिए।

राज्य पुर्नसंरचना आयोगले पोखरा उपमहानगर र लेखनाथ नगरपालिकालाई मिलाएर पोखरा लेखनाथ महानगरपालिका बनाउन सिफारिस गरेको थियो। पछि कास्कीका दलहरुले आयोगको सिफारिस अनुसारकै नामलाइ अगाडि बढाएका थिए।

महानगरपालिकाको नाम लामो भएको र छोटो, छरितो बनाउनका लागि जनस्तरबाटै आवाज उठेपछि महानगरको नाम छोट्टाइएको हो। साविकको लेखनाथ नगरपालिकामा पर्ने २६ देखि ३३ सम्मका वडाध्यक्ष समेतले नाम परिवर्तनगरी पोखरामात्रै राख्न सहमती जनाएका थिए।