पर्वतमा पहिरोमा परी एक बेपत्ता,राजमार्ग अवरुद्ध हुदा उद्धारमा कठिनाइ

शुभेच्छा न्यूज

पर्वत /अबिरल बर्षाका कारण पहिरोले घर बगाउँदा पर्वतको जलजला गाउँपालिका – ८ लस्दी बेरनेटामा एक युवा बेपत्ता भएका छन । मंगलबार राती १ बजेको समयमा घरमाथिबाट आएको पहिरोले घर बगाउँदा १६ बर्षिय बिकास परियार बेपत्ता भएका हुन । उक्त स्थानमा पहिरोले थप ३ घर समेत बगाएको छ भने ५ जना स्थानियबासी सम्पर्क बिहीन छन ।

पहिरोका कारण १५ घर बिस्थापित भएकाले सुरक्षित स्थानमा सारिएको छ । यसैगरी जलजला गाउँपालिका वडा नं ६ धाइरिङ्ग बास्कोटमा भीमलाल आचार्यको घर भत्कँदा उनी सहित ५ जना घाइते भएका छन भने सो स्थानमा पनि धेरै घर जोखिममा परेका छन ।

बर्षाका कारण मालढुंगा बेनी सडकका धेरै स्थानमा पहिरो गएका कारण सडक अबरुद्ध हुँदा सदरमुकाम कुस्माबजारबाट उद्दारमा गएको टोली घटनास्थलमा पुग्न सकेको छैन ।

प्रमुख जिल्ला अधिकारी गुरुदत्त ढकालको नेतृत्वमा नेपाल प्रहरी, शसस्त्र प्रहरी र नेपाली सेनाको टोली त्यस तर्फ गैरहेको छ । मिलनचोक प्रहरी चौकीबाट पुगेको प्रहरी टोलीले उद्दारको काम गरिरहेको प्रमुख जिल्ला अधिकारी गुरुदत्त ढकालले जानकारी दिए।