स्पष्टीकरण फिर्ता गर्दै उपाध्यक्षले गल्ती स्विकारेपछि पर्वतको पैंयु गाउँपालिकाका जनप्रतिनिधीले थालेको धर्ना सकियो

शुभेच्छा न्यूज
पर्वत/पर्वतको पैंयु गाउँपालिकामा जनप्रतिनिधीले थालेको धर्ना सहमति पछि अन्त्य भएको छ ।
जिल्ला समन्वय समिति पर्वतको पहलमा आन्दोलनरत पक्ष र गाउँपालिका बिच सहमति भएपछि धर्ना अत्य गरिएको हो ।

गाउँपालिका उपाध्यक्ष जसमति गुरुङ्गले वडा अध्यक्ष महेन्द्र श्रेष्ठलाई सोधेको स्पष्टीकरणको पत्र फिर्ता गर्ने सहमति भएको छ भने वडा अध्यक्षलाई स्पष्टीकरण सोध्ने कार्य गल्ती भएको स्विकार गरेकी छन ।

जिल्ला समन्वय समिति पर्वतका प्रमुख मनोहर बिश्वकर्मा पौडेलले दुबै पक्षका बिचमा वार्ताबाट सहमित कायम भएकाले आन्दोलन फिर्ता भएको जानकारी दिए ।

सहमति पछि पैञ्यु गाउँ कार्यपालिकाको बैठक बसेर स्पष्टीकरणको पत्र फिर्ता गर्ने निर्णय भएको र बैठकमा उपाध्यक्षले आफ्नो गल्ती भएको स्विकार गरेपछि सहमतिमा धर्ना टुंग्याइएको आन्दोलनरत वडा अध्यक्ष महेन्द्र श्रेष्ठले जानकारी दिए ।

‘वडा सदस्यलाई कार्यवहाक दिएर परिवार भेट्न छोटो समय बिदेशमा जाँदा गैह्रकानुनी रुपमा पत्र पठाउने काम भएको थियो’ उनले भने ‘पद नै रिक्त गराउने षडयन्त्र सहित गैह्रकानुनी रुपमा सोधिएको स्पष्टीर फिर्ता भएको छ’ ।

उपाध्यक्ष गुरुङ्ग कार्यबहाक अध्यक्ष भएको समयमा गएको साउन ८ गते वडा अध्यक्ष श्रेष्ठलाई लगातार तीन वटा बैठकमा बिना जानकारी अनुपस्थित भएमा पद रिक्त हुने ब्यबस्था भएको’ ब्यहोरा सहित सात दिने स्पष्टीकरण सोधेकी थिइन ।

उपाध्यक्षको पत्रपछि श्रेष्ठ जापानबाट नेपाल फर्केपछि गाउँपालिका कार्यलयमा तालाबन्दी गर्दै आन्दोलन शुरु भएको थियो । श्रेष्ठ जेठ २९ गते वडा सदस्य मोतीलाल न्यौपानेलाई कार्यवहाक दिएर परिवारका सदस्य भेट्न जापान गएका थिए ।

तर नेपाल कम्युनिष्ट पार्टी(नेकपा) बाट निर्वाचित वडा अध्यक्ष महेन्द्र श्रेष्ठको पद षडयन्त्रपुर्वक रिक्त गराउने योजना बनाएर स्पष्टीकरण सोधिएको भन्दै उपाध्यक्षको राजिनामा माग गर्दै तीन वटा वडाका अध्यक्ष र सामाजिक परिचालकहरु बुधबार देखि धर्नामा बसेका थिए ।

newsdabali