प्रदेश सांसद पहारीले भने : वाटर फ्रन्ट रिसोर्टलाई सुरुमै भत्काउनुपर्छ

पोखरा- प्रदेश सांसद राजीव पहारीले फेवातालको जग्गा मिचेर बनाईएको कर्ण शाक्यको वाटर फ्रन्ट रिसोर्टलाई सुरुमै भत्काउनु पर्ने बताएका छन्।

फेवातालको क्षेत्रफल अतिक्रमण गरेर बनाईएको शाक्यको रिर्सोटसँगै अतिक्रमण गर्ने सबै संरचना भत्काएर फेवाताललाई संरक्षण गर्नुपर्ने बताएका हुन्।

नेकपाका सांसद पहारीले यसअघिका विभिन्न प्रदेशसभा बैठकमा पनि फेवातालको विषय उठान गरिरहेका छन्।

बिहीबार गण्डकी प्रदेशसभाको विशेष समयमा बोल्दै उनले भने, ‘फेवातालको जग्गा अतिक्रमण गर्ने अधिकार कसैलाई छैन्, चाहे त्यो कर्ण शाक्यको रिसोर्ट होस वा अरु कसैको, सबैलाई समानरुपमा कारवाही गरिनुपर्छ।

उनले स्थानीय तह र प्रदेश सरकारले लगाएको करको विषयमा जानकारी गराउन आग्रह गरे। कास्कीको माछापुच्छ्रे गाउँपालिकाले नक्सापासको शुल्क ३१ हजार रुपैयाँ लिएको विषय सदनमा जानकारी गराउँदै उनले सबै तह र प्रदेशले एकद्वार प्रणालीबाट कर लगाईनुपर्ने बताए।