बलात्कार घटनामा गलत रिपोर्ट दिने दुई डाक्टर कारबाहीका लागि सिफारिस

शुभेच्छा न्यूज
पोखरा । बलात्कारको घटनामा गलत स्वास्थ्य परीक्षण प्रतिवेदन दिने दुई चिकित्सक कारबाहीका लागि सिफारिस गरिएको भएका छन्। महान्यायाधिवक्ता अग्निप्रसाद खरेलको संयोजकत्वमा रहेको सरकारवादी फौजदारी मुद्दाको काम कारवाहीमा समन्वय समितिले जिल्ला प्रहरी कार्यालय धनुषाको पत्राचार अनुसार दुई चिकित्सकलाई कारबाहीको सिफारिस गरेको हो।

धनुषा जनकनन्दनी गाउँपालिका २ बस्ने करण मण्डलले जबर्जस्ती करणी मुद्दामा जनकपुर अञ्चल अस्पताल र जिल्ला अस्पताल सिराहाबाट प्राप्त भएको स्वास्थ्य परीक्षण प्रतिवेदन फरक परेको पत्राचार प्रहरीले महान्यायाधिवक्ता कार्यालयमा गरेको थियो। अञ्चल अस्पतालका डाक्टरहरूले अनुसन्धान कार्यलाई प्रभावित हुने गरी रिपोर्ट दिएको भनी प्रहरीले पत्राचार गरेको थियो।

महान्यायाधिवक्ता खरेल नेतृत्वको समितिले जनकपुर अञ्चल अस्पतालका डाक्टरद्वय विजयकुमार सिंह र रमा गोइतलाई कारबाहीका लागि मेडिकल काउन्सिललाई सिफारिस गर्ने निर्णय गरेको हो।