अख्तियारमा राजनीतिक गन्ध आउनै दिन्नँ

पोखरा- अख्तियार दुरुपयोग अनुसन्धान आयोगका प्रमुख आयुक्त नवीनकुमार घिमिरेले आयोगको कामकारवाहीमा राजनीतिक गन्ध आउन नदिने बताएका छन् ।सुशासनका लागि नागरिक समाज कास्कीले आयोजना गरेको अन्तरक्रियामा घिमिरेले भ्रष्टाचार गर्ने जोकोहीलाई नछाडिने बताए ।

आयोगको काममा सरकारी र राजनीतिक दबाब नरहेको स्पष्ट पार्दै उनले अख्तियार आफ्नो क्षेत्राधिकारअनुरुप भ्रष्टाचार नियन्त्रणमा निरन्तर लाग्ने उल्लेख गरे । ठेक्का लिएपछि लामो समयसम्म आफ्नो नियन्त्रणमा लिने र काम नगर्ने प्रवृत्ति बढेकामा जोड दिँदै उनले त्यस्तालाई अनुसन्धानको दायरामा ल्याइने बताए ।

राष्ट्रिय गौरवका आयोजनालाई निरन्तर अनुगमन गर्ने बताउँदै प्रमुख आयुक्त घिमिरेले ती योजनामा हुने भ्रष्टाचार नियन्त्रण गर्न आयोग लाग्ने बताए । अख्तियारमा वार्षिक २० हजारको हाराहारीमा उजुरी पर्ने गरेको र आयोगका कामको प्रभावकारिता बढाउन समयसापेक्ष तालीम प्रदान गर्ने गरिएको पनि कार्यक्रममा जानकारी दिए ।