पोखरा प्रिमियर लिग आज देखी, पोखरा पल्टन र विराटनगर उद्घाटन खेलमा भिड्दै

शुृभेच्छा न्यूज सम्वाददाता
पोखरा।पोखरा प्रिमियर लिग (पीपीएल) ट्वान्टी–२० क्रिकेट शुक्रबार पोखरा रंगशाला मैदानमा सुरु हुँदै छ  । उद्घाटन खेलमा घरेलु टोली पोखरा पल्टनले विराटनगर टाइटन्ससँग प्रतिस्पर्धा गर्नेछ ।

शरद भेषवाकरको कप्तानीमा पोखरा पल्टन मैदान उत्रँदै छ । सन्दीप लामिछाने मार्की प्लेयर रहेको विराटनगर टाइटन्समा पनि अनुभवी युवाको वर्चस्व छ । कप्तान शरदले बलियो आत्मविश्वाससाथ मैदानमा उत्रने तयारी गरेको बताए । ‘तयारी राम्रै भएको छ,’ उनले भने, ‘घरेलु टिम पनि हो । बेस्ट दिएर प्रदर्शन गर्छौं ।’

उनीसहित टिममा रोहित पौडेल, विनोद भण्डारी, ललित राजवंशी, महबुब आलम जस्ता राष्ट्रिय खेलाडी छन् । कुशल भूर्तेल, कृष्ण कार्की, रशिद खान, विक्रम भुसाल, आशिफ शेख, इशान पाण्डे र दिवांशु मल्लिक पोखरा पल्टनमा छन् ।

विराटनगर टाइटन्स पनि पोखरा पल्टनलाई हराएर लिगमा सुखद सुरुआत गर्ने पक्षमा छ । स्टार प्लेयर सन्दीप लामिछानेको कप्तानीमा उपाधि आºनो पोल्टामा पार्ने गरी तयारी गरेको टिमले जनाएको छ । टिममा दीपेश श्रेष्ठ, प्रदीप ऐरी, सुनील धमला, किशोर महतो, शाहब आलम, जितेन्द्र मुखिया, राजेश पुलामी, किशोर महतो, पुष्प थापा, राजु रिजाल, जितेन्द्रसिंह ठकुरी, रविन जोशी र हिमांशु दत्ता छन् ।

क्विन्स इभेन्ट्स म्यानेजमेन्ट प्रालिले गरेको पीपीएल नेपालको सर्वाधिक धनराशिको क्रिकेट प्रतियोगिता हो । विजेताले २७ लाख र उपविजेताले १० लाख रुपैयाँ पाउने छन् ।

पीपीएलका उत्कृष्ट ब्याट्सम्यान र बलर तथा म्यान अफ द सिरिजमा चुनिनेले सुजुकी जिक्सर मोटरसाइकल पाउने छन् । प्रत्येक खेलको उत्कृष्टले रिलायन्स सुपरटेक म्यान अफ द म्याचले १० हजार रुपैयाँ र ५ हजारबराबरको गिºट पाउने छन् । साथै प्रत्येक खेल जित्ने टिमलाई विनिङ बोनसस्वरुप १५ हजार ५ सय प्रदान गरिने छ । प्रतियोगितालाई नमस्ते प्रिमियर बियरले प्रायोजन गरेको छ ।

लिग चरणमा पहिलो हुने टिम फाइनल पुग्छन् । दोस्रो र तेस्रो हुने टिमबीचको विजेता पनि फाइनल पुग्छ । पोखरा पल्टन र विराटनगर टाइटन्ससहित पारस खड्का मार्की प्लेयर रहेको चितवन राइनोज, ज्ञानेन्द्र मल्ल मार्की प्लेयर रहेको काठमाडौं रोयल्स, सोमपाल कामी मार्की प्लेयर रहेको बुटवल ब्लास्टर्स र दीपेन्द्र ऐरी मार्की प्लेयर रहेको धनगढी ब्लुज प्रतिस्पर्धामा छन् ।