बढ्दो यात्रुको चापसंगै मनकामना केवलकारले थप्यो तीन डिब्बा’ अब दैनिक थप एकहजार यात्रुले सेवापाउने

शुभेच्छा न्यूज संम्वाददाता
गोरखा। मनकामना दर्शन प्रालिले यात्रुहरुको चापलाइ मध्यनजर गर्दै आफ्नो क्षमता विस्तार गरेको छ । कुरिनटारमा सोमवार एक कार्यक्रमको आयोजना गरि संस्कृति, पर्यटन तथा नागरिक उड्ययनमन्त्री रविन्द्र अधिकारीले केवलकारका थप तीन डिब्बा थप गरि उद्घाटन गरेका हुन् ।

यसअघि ३१ वटा डब्बाले सेवा दिइरहेका थिए । अब कुल ३४ वटा डब्बाबाट सेवा प्रदान गरिने मनकामना दर्शनले प्रालिले जनाएको छ । थपिएको डिब्बाबाट दैनिक १ हजार थप यात्रुहरुले आवत जावत गर्न सक्नेछन् ।

उद्घाटन कार्यक्रममा बोल्दै मन्त्री अधिकारीले भने, ‘नेपालको पर्यटन क्षेत्रमा मनकामना केवलकार ईन्नोभेसनले धेरै महत्वपूर्ण योगदान पु¥याएको छ, यहि केवलकार ईन्नोभेसनमार्फत स्थापित भएको डेस्टिनेसन पनि हो’ ।

उनले मेचीदेखि महाकालीसम्म पर्यटकीय गन्तव्य भएको बताउँदै त्यसको विकास गर्नुपर्ने बताए ।पर्यटनमन्त्री अधिकारीले मुलुकमा पर्यटकहरुको ३० प्रतिशतले बृद्धि भएको बताउँदै त्यसमा आन्तारिक पर्यटकको योगदान पनि राम्रो रहेको बताए ।

मनकामना केवलकारका प्रवन्ध निर्देशक राजेशबाबु श्रेष्ठले हाल भारतीय पर्यटकहरु धेरै मात्रामा आउने थालेको बताए । गत वर्ष केवलकार चढ्नेमा २१ प्रतिशत भारतीय पर्यटकहरु थिए’ ।

१८ वर्षअघि सञ्चालनमा ल्याइएको यो केबलकारमा अहिलेसम्म १ करोड ३८ लाख भन्दा बढी व्यक्तिहरुले केवलकार चढिसकेका छन्।केवलकारमा वार्षिक १० लाख यात्रु चढ्ने गरेको कप्नीले जनाएको छ ।