पत्रकार त्रिपाठीले गरे पहिलो फिल्म ‘लक्ष्मी रानी’को निर्माणको घोषणा

शुृभेच्छा न्यूज संम्वाददाता
पोखरा/ पत्रकारितामा लामो समयदेखि सक्रिय रहेका विनोद त्रिपाठीले ‘लक्ष्मी रानी’ नामक फिल्म निर्माण गर्ने भएका छन् ।तिहारको लक्ष्मी पुजाको अवसरपारी नेपाली फिल्म ‘लक्ष्मी रानी’को निर्माण घोषणा भएको छ ।

बुधबार राजधानीमा एक गीत रेकर्ड गर्दै फिल्मको शुभ मुहूर्त गरिएको जनाइएको छ। महिलाप्रधान कथामा आधारित यस फिल्मबाट अभिनेत्री समेत रहेकी शुभेच्छा थापा निर्देशकको रुपमा डेब्यु गर्दैछिन् । कलाकारको रूपमा शुभेच्छा लिड फिमेल भूमिकामा छिन् भने पटकथा लेखन पनि उनैको रहेको जानकारी दिइएको छ ।

यस फिल्म निर्माता त्रिपाठीको समेत विशेष भूमिका हुनेछ । निर्माता त्रिपाठीले आफुले निर्माण गर्ने फिल्म ‘लक्ष्मी रानी’ नेपाली फिल्ममा कोशेढुंगा बन्ने समेत बताएका छन् । चलचित्रले पस्कने विषयबस्तु पनि दर्शकको रोजाईको विषय बन्ने उनको विस्वास छ ।

निर्देशक थापाकाअनुसार फिल्मले आधुनिक र ग्रामीण दुई आयामका महिलाको संघर्ष र प्रवृत्तिको कथा प्रस्तुत गर्नेछ । उक्त फिल्मको टिजर पोस्टरमा सहरिया युवतीले बेद र ग्रामीण युवतीलाई अंग्रेजी पुस्तक समातेको चित्रण छ ।

फिल्ममा शुभेच्छा र विनोदसहित भोजपुरी फिल्मका सुपरस्टार परदेशी शाह, जयकिसन बस्नेत, मिथिला शर्मा, श्याम राई र पल्पसा डंगोलको समेत मुख्य भूमिका हुनेछ ।

विगतमा कान्तिपुर दैनिकसँग आबद्ध उनी हाल सौर्य दैनिकका सम्पादक छन् । माओवादी द्वन्द्वकालमा चर्चित पत्रकार त्रिपाठी राजनीतिक रिपोर्टिङमा दखल राख्छन् । फिल्मी क्षेत्रमा उनको यो पहिलो पाइला हो ।