चितुवाको आक्रमणबाट तनहुँको भानुमा बालकको मृत्यु

शुभेच्छा न्यूज संम्वाददाता
तनहुँ / चितुवाको आक्रमणबाट तनहुँमा शनिबार राति एक बालकको मृत्यु भएको छ ।चितुवाको आक्रमणबाट मृत्यु हुनेमा तनहुँको भानु नगरपालिका-२ ढल्केवरका १० वर्षीय अमृत गुरुङ रहेका छन् ।

चितुवाको आक्रमणबाट घाइते भएका बालकको डुम्रेस्थित लक्ष्मी अस्पतालमा उपचारको क्रममा निधन भएको जिल्ला प्रहरी कार्यालय तनहुँका प्रहरी नायब उपरीक्षक श्यामु अर्यालले बताए ।

खाना खाएर हात धुन घरको आँगनमा निस्केका गुरुङलाई चितुवाले आक्रमण गरेर लगेको थियो । छोरा घरभित्र नआएपछि बाबु माइला गुरुङले प्रहरीलाई खबर गरेका थिए । प्रहरी र स्थानीयवासीको सहयोगमा खोजतलास गर्दा घरभन्दा केही तल रहेको खोल्सामा अमृतले लगाएको ज्याकेट भेटिएको थियो ।

उक्त खोल्साभन्दा तल अमृत घाइते अवस्थामा भेटिएका थिए । उनको घाँटीमा चितुवाको नङग्राले चिथोरेको थियो । चितुवाको आक्रमणबाट बालकको ज्यान गएलगत्तै चितुवालाई नियन्त्रण लिन प्रहरी परिचालन गरिएको छ ।

त्यस्तै, गत वर्षेखि चितुवाले मानिसलाई आक्रमण गर्न थालेपछि भानु नगरपालिकामा त्रास बढेको छ । चितुवाको आक्रमणबाट १७ दिनको अवधिमा दुइ जनाको ज्यान गएपछि स्थानीयवासी त्रसित भएको स्थानीयले बताए ।कात्तिक २९ गते चितुवाको आक्रमणबाट भानु नगरपालिका-४ जोखाने निवासी चार वर्षीया बालिका रञ्जिता लम्सालको मृत्यु भएको थियो ।