पोखरा अन्तराष्ट्रिय क्षेत्रीय विमानस्थल ६ महिनाअघि नै निर्माण हुन्छ : मन्त्री अधिकारी

शुभेच्छा न्यूज संम्वाददाता
पोखरा । संस्कृति, पर्यटन तथा नागरिक उड्डयन मन्त्री रविन्द्र अधिकारीले पोखरा अन्तराष्ट्रिय क्षेत्रीय विमानस्थल तोकिएको समय भन्दा ६ महिना अघि निर्माण सम्पन्न हुने बताएका छन् ।

जनकल्याण क्लवद्धारा पोखराको काहुँडाँडामा आयोजना गरिएको तेश्रो काहुँ धरहरा महोत्सवको शुक्रबार उद्घाटन गर्दै उनले विमानस्थल निर्माण कार्य तिब्र गतिमा भएको कारण सन २०२१ को शुरुदेखिनै सञ्चालनमा आउने विश्वास व्यक्त गरे ।

विमानस्थल निर्माण सम्पन्न भई सञ्चालनमा आएसंगै पर्यटनको विविधिकरण अपरिहार्य रहेको उल्लेख गर्दै उनले संमाव्यता अध्ययन गरी आवश्यक भौतिक पूर्वाधार तयार गर्न व्यवसायिलाई आग्रह गरे ।

११ महिनाको अवधिमा हवाई जहाजबाट ११ लाख र सडक यातायातबाट १२ लाख गरि कूल २२ लाख पर्यटक नेपाल आएको तथ्याङ्क उल्लेख गर्दै उनले मुलुकले सन २०२० सम्ममा लगभग २५ लाख र २०३० को अवधिमा ५० लाख भन्दा बढी पर्यटक भित्राउने आधार तयार भएको बताए ।

मुलुकको आर्थिक विकास समृद्धिका लागि पर्यटन महत्वपूर्ण क्षेत्रको रहेको बताउँदै उनले अवको पर्यटन कृषकले उत्पादन गरेको वस्तुको मूल्य र बजारीकरणसहित रोजगार सिजर्ना गर्ने खालको हुनु पर्नेमा जोड दिए ।

वर्तमान सरकार आर्थिक विकास र समृद्धिका लागि कृयाशिल रहेको बताउँदै मन्त्री अधिकारीले स्थानीय, प्रदेश र संघीय सरकार जनताको सेवामा समर्पित रहेको उल्लेख गरे ।

मुलुकमा परिवर्तनको अनुभूति हुने गरि हरेको मान्छेले रोजगारी पाउने अवस्थाको सिर्जना गरेर समृद्ध नेपाल सुखी नेपाली अभियानलाई सफल बनाउन सबै क्षेत्रको भूमिका महत्वपूर्ण रहने उनले बताए ।

गण्डकी प्रदेश सभा सदस्य मिना गुरुङले पर्यटन प्रवद्र्धन प्रदेश सरकारको पहिलो प्राथमिकता रहेको उल्लेख गर्दै पर्यटनको विकास जनताको समृद्धिसंग जोडिने विश्वास व्यक्त गरे ।

अर्का प्रदेश सभा सदस्य विन्दु थापाले होमस्टेको माध्येमबाट सहर केन्द्रीत पर्यटकलाई ग्रामीण क्षेत्रमा विस्तार गरि आर्थिक समृद्धिको आधार निर्माण गर्नुपर्ने बताए ।

‘काहुँ दृष्यावलोक एक गन्तव्य” भन्ने मूल नारा सहित आयोजित महोत्सव मंसिर २८ गतेदेखि पुस ८ गतेसम्म सञ्चालन हुने महोत्सव व्यवस्थापन समितिका संयोजक दिपकप्रसाद आचार्यले जानकारी दिए ।