बेनीमा भएको आगलागीबाट १३ लाखको क्षति

शुभेच्छा न्यूज संम्वाददाता

म्याग्दी। म्याग्दी सदरमुकाम बेनीको न्युरोडमा रहेको एक घरमा आगलागी हुँदा झण्डै १३ लाख बराबरको क्षति भएको छ।

विक्रम विकको चार तले घरको माथिल्लो तलामा रहेको कोठामा शुक्रबार बिहान आगलागी हुँदा १२ लाख ८५ हजार बराबरको क्षति भएको अनुमान गरिएको जिल्ला प्रहरी कार्यालय म्याग्दीका प्रमुख प्रहरी नायव उपरीक्षक वीरबहादुर बुढाले जानकारी दिए।

ब्लकले बनाएको माथिल्लो तलाको कोठामा आगलागी हुँदा नगद दुई लाख ७० हजारसहित महत्वपूर्ण सामानहरू जलेको प्रहरीले बताएको छ। प्रारम्भिक अनुसन्धानअनुसार घरमा विद्युत् सर्ट भएर आगलागी भएको हुनसक्ने देखिएको पनि प्रहरी नायव उपरीक्षक बुढाले बताए।

आगलागीमा तीन थान मोबाइलसहित गरगहनासमेत जलेका छन्।  स्थानीयबासी र प्रहरीको सहयोगमा करिब ४५ मिनेटपछि दमकलको प्रयोग गरेर आगो नियन्त्रणमा लिइएको थियो।