होटल ब्याबसायीलाई कास्की प्रहरी प्रमुख रानाको सुझाव,परिचय खुल्ने गरी रेकर्ड राख

शुभेच्छा न्यूज संम्वाददाता
पोखरा / पृथ्वी होटल व्यवसायी समितिले जिल्ला प्रहरी कार्यालय कास्कीको सहकार्यमा पोखरामा आयोजना गरेको अन्र्तक्रियामा विभिन्न बहानामा प्रहरीले आफूहरुलाई दुःख दिएको गुनासो गरेका हुन् ।

उनीहरुले व्यवसायलाई मर्यादित र सुरक्षित बनाउन हरदम तयार भएपनि प्रहरीले कहिले ढिलो सम्म खोलेको,यौन कृयाकलापलाई प्रश्रय दिएको भन्दै दुःख दिने गरेको गुनासो गरे ।

कार्यक्रममा बोल्दै पृथ्वी होटल व्यवसायी समिति पोखराका संस्थापक अध्यक्ष रिजन शेरचनले प्रहरीले साँझ ८÷९ बजे नै आएर किन ढिलासम्म होटल खोलेको भन्दै होटल बन्द गर्न लगाउने गरेको गुनासो गरे ।

समितिका अध्यक्ष हरिप्रसाद पाण्डेले होटलका नियमहरु बनाएर दिए लागू गर्न आफूहरु तयार रहेको बताउँदै तर अनावश्यक रुपमा दुःख नदिन आग्रह गरे । उनले मापदण्ड तोड्ने होटल व्यवसायीलाई कार्वाही गर्न आफूहरु तयार रहेकोसमेत जानकारी गराए ।

कास्कीका प्रहरी प्रमुख प्रहरी उपरिक्षक (एसपी) ओमबहादुर रानाले होटल व्यवसायीलाई दुःख दिने आफूहरुको नियत नभएको स्पष्ट पारे । उनले विकृति विसंगति सबैले मिलेर अन्त्य गर्नुपर्ने बताउँदै त्यसका लागि कहिलेकाहिं होटलमा छापा मार्नुपरेको स्पष्टीकरण दिए । उनले कसैले डर, धम्की वा त्रास देखाएमा जानकारी गराउन आग्रह गर्दै त्यस्तो पाइए जो कोहि भएपनि कार्वाही गर्ने प्रतिबद्धता जनाए ।

एसपी रानाले होटलमा बास बस्नेको पूर्ण परिचय राख्न आग्रह गर्दै परिचय पत्र नै राख्नेबारेमा पनि छलफल गरेर लागू गर्न सकिने बताए । उनले मदिरा ९ बजेसम्म बेच्ने शर्तमा खाना खानका लागि मात्र राती १२ ,१ बजेसम्म सञ्चालन गर्नका लागि दिन सकिने बताए ।