सर्वोच्च अदालतको आदेशमा रिहाई भएपछि सपथग्रहणको लागि मनाङेको निवेदन

शुभेच्छा न्यूज संम्वाददाता
पोखरा / सर्वोच्चको आदेशमा थुनामुक्त भएका गुण्डानाईके राजीव गुरुङ उर्फ दीपक मनाङेले गण्डकी प्रदेशसभामा सपथग्रहणको लागि निवेदन दिएका छन्। मनाङेले विहिबार प्रदेशसभा प्राङ्गणमै आएर लिखित निवेदन दिएका हुन्।

प्रदेशसभा सचिवालयका उपसचिव नारायणप्रसाद अधिकारीका अनुसार सपथग्रहण गरिपाउँ भन्ने विषयको निवेदन प्रदेशसभा सचिवालयमा दर्ता भएको छ। निवेदन दर्ता भएतापनि बाँकी प्रक्रिया भने कानुन अनुसार नै हुने सभामुख नेत्रनाथ अधिकारीले जानकारी दिए। उनी थुनामुक्त भएपनि सपथग्रहण गर्न पाउँछन कि पाउँदैनन् भन्ने विषय कानुन अनुसार अगाडि बढ्ने अधिकारीले बताए।

गतवर्ष मंसिर १० गते भएको पहिलो चरणको निर्वाचनमा उनले स्वतन्त्र उम्मेदवारी दिएर विजयी भएका थिए। निर्वाचन जितेतापनि प्रदेशसभा सदस्यको हैसियतमा सपथ लिएका छैनन्।

गण्डकी प्रदेशको प्रदेशसभा नियमावली अनुसार बिना जानकारी लगातार १० बैठकमा उपस्थित नहुने प्रदेशसभा सदस्यको पद खारेज हुने व्यवस्था छ। तर, प्रदेशसभामा सपथ नलिएका कारण मनाङेको पद भने गएको छैन्।

तत्कालीन एमालेबाट चुनाव लड्न खोजेतापनि एमालेले उनको छविका कारण टिकट दिएन। टिकट नदिएतापनि एमालेकै सहयोगमा उनले चुनाव जिते र प्रदेशसभा सदस्य बन्न पुगेका थिए। डनको छवि बनाएका मनाङे प्रदेशसभा छिर्नुअगावै गत वैशाखमा ज्यान मार्ने उद्योग अन्तर्गत कारागार चलान भएका थिए।