लेकसाइडको सडक महोत्सवमा पटाका नपट्काउन अदालतकाे आदेश

शुभेच्छा न्यूज संम्वाददाता
पाेखरा/ अंग्रेजी नयाँ वर्षको अवसरमा फेवाताल किनारमा हुने सडक महोत्सवमा पटाका नपट्काउन उच्च अदालत पोखराले बुधबार आदेश जारी गरेको छ ।

राष्ट्रिय सम्पदा जनअधिकार संरक्षण समितिले पुस १७ गते राति लेकसाइड क्षेत्रमा पटकाजन्य पदार्थ नपडकाउन माग गर्दै दर्ता गरेको रिटमा बुधबार विपक्षीका नाममा आदेश जारी गरेको हो ।

समितिका अध्यक्ष रामबहादुर पौडेलले पुस ५ गते पोखरा महानगरालिका, जिल्ला प्रशासन लगायतलाई विपक्षी बनाएर निषेधाज्ञा परमादेशसहितको आदेश माग गर्दै रिट दर्ता गरेका थिए । न्यायाधीश रामचन्द्र यादव र नरबहादुर शनाहीको इजलाशले उक्त आदेश जारी गरेको हो ।

आदेशमा भनिएको छ, ‘न्यु इयर इभको सन्दर्भमा पुस १३ देखि १७ गतेसम्म महोत्सव हुने स्थानमा कुनै किसिमका पटका वा आतिसबाजी नपट्काउनु पट्काउन नलगाउनू भनी विपक्षीहरुका नाममा आदेश जारी गरिएको छ ।’

विस्फोटक पदार्थ ऐन २०१८ को दफा १० मा आतसवाजी वा पटाका पट्काएमा १ हजार रुपैयाँसम्म जरिवाना हुनेगरी आतसबाजी वा पटका पट्काउन रोक लगाएको छ ।

पोखराको ड्यामसाइडदेखि फेवातालको पूरै एरिया सिमसारमा सूचीकृत भएकाले उक्त स्थानमा आतसवाजी वा पटका पट्काउँदा ध्वनि प्रदूषण भइ त्यहाँ रहेका जलचर तथा स्थलचर जनावर तर्सने, भाग्ने र जनजीवन तथा स्वास्थ्यमा समेत आशंक पर्ने भएकाले अन्तरिम आदेशको माग गर्दै रिट दायर भएको थियो ।

वरिष्ठ अधिवक्ताद्वय तीलक पराजुली र विश्व घिमिरे, अधिवक्ता सुरेन्द्र थापामगरले निवेदकको तर्फबाट वहसपछि गरेका थिए । उक्त रिटमा मुख्य न्यायाधीश कुमार चुडालले पुस ६ गते निवेदकको माग वमोजिम आदेश किन जारी नगर्नु पर्ने हो कानुनसम्म आधार र कारण समेत खुलाई बाटोको म्यादवाहेक १५ दिनभित्र लिखित जवाफ पेस गर्न आदेश दिएका थिए ।