शुक्लागण्डकी महोत्सवमा “हेलिकप्टर“ चढ्नेको आकर्षण बढ्दै

शुभेच्छा न्यूज संम्वाददाता
पोखरा / तनहुँको दुलेगौँडामा जारी प्रथम शुक्लागण्डकी महोत्सवमा शनिबार करिब १० हजार दर्शकले महोत्सवको अवलोकन गरेको आयोजकले बताएको छ । पछिल्लो दिनहरुमा क्रमिक रुपमा बढ्दै गएको दर्शकको सहभागीताले व्यापार पनि बढेको महोत्सवका प्रवक्ता हरि खड्काले बताए ।

प्रवक्त खड्काका अनुसार छैठौँ दिनसम्म करिब १ करोड ४५ लाख बराबरको आर्थिक कारोबार भएको छ । महोत्सवमा हरेक दिन दर्शकको संख्या बढ्दै गएको छ, व्यापार पनि बढ्दो छ प्रवक्ता खड्काले भने हामी हाम्रो लक्ष्यमा सफल हुन्छौँ भन्नेमा विश्वस्त छौँ ।

त्यस्तै, आयोजकले प्रभु कम्पनीसंग समन्वय गरेर शनिबार शुक्लागण्डकीको आकाशमा हेलिकप्टर उडाएपछि महोतसवको थप रौनकता बढेको छ । शुक्लागण्डकी क्षेत्रको प्राकृतिक, ऐतिहासिक, धार्मिक तथा पर्यटकीयस्थलको पचारप्रसार गर्ने उद्देश्यले हेलिकप्टरबाट अवलोकन गर्ने व्यवस्था मिलाएको हो ।

शनिबार मात्रै हेलिकप्टरबाट ५१ जनाले शुक्लागण्डकी क्षेत्रको सुन्दर दृश्य अवलोकन गरेका छन् । विभिन्न स्थानमा संचालित महोत्सवहरुमा हेलिकप्टरबाट दृश्य अवलोकन गर्ने अभ्यासहरु भएको भए पनि शुक्लागण्डकीमा पहिलो पटक हेलिकप्टरबाट दृश्य अवलोकन गर्न दर्शकहरुको आकर्षण बढेको हो ।

अझै पनि हेलिकप्टरबाट अवलोकन गर्न चाहानेहरुको माग भइरहेकाले कम्पनीसंग छलफल गरेर महोत्सवमा अर्को दिन पनि हेलिकप्टर ल्याउने सम्भावना रहेको प्रवक्ता खड्काले बताए ।

हेलिकप्टरबाट शुक्लागण्डकीको पर्यटकीय, धार्मिक तथा ऐतिहासिक स्थलहरु ढोरबाराही, तीनखोले देवी, च्यवनधाम, मुलबाराही मन्दिर, भुलभुले देवीको मन्दिर तथा पर्यटकीय स्थलहरु दगाम, स्थानथोक भुजिकोट, लामागाउँ घरेडी, रक गार्डेन, ढोरफिर्दी भिमाद, म्याग्दे र लेखनाथको आसपास क्षेत्रको प्राकृतिक दृश्यहरु समेत अवलोकन गराइएको थियो ।