नमुना बिद्यालयको बिरासत जोगाउने योजना बुन्दै महेन्द्र नमूना माध्यमिक विद्यालय

सन्ताेष महतारा
गुल्मी /सदरमुकाम तम्घासमा रहेकोएक विद्यालयले शैक्षिक सत्र २०७५ देखि ०८० सम्मको आफ्नो पञ्चवर्षीय गुरुयोजना प्रस्तुत गरेको छ ।

सदरमुकाम स्थित रहेको महेन्द्र नमूना माध्यमिक विद्यालयले विद्यालयलाई नाम मात्रको नमूना विद्यालय होईन काममा पनि जिल्लाकै नमूना विद्यालय बनाउनको लागि १ सय ८७ पृष्ठको गुरुयोजना समेत तयार पारेको छ।

गुरुयोजना प्रस्तुत गर्दै प्रधानाध्यापक शरबहादुर थापाले भने ‘नेपाल सरकारबाट २०७४ सालमा जिल्लाकै एउटा नमूना विद्यालयको रुपमा घोषणा भएको विद्यालयलाई सबै मिलेर जिल्लाकै उत्कृष्ट र नमूना विद्यालय बनाउँछौ ।’

विद्यालयलाई शैक्षिक, भौतिक र आर्थिक रुपमा सबल बनाउने र एक अनुपम उत्कृष्ट नमूना विद्यालय बनाउनका लागि यो गुरुयोजना तयार पारिएको विद्यालयका सहायक प्रधानाध्यापक युवराज ज्ञवालीले जानकारी दिए । विद्यालयको तर्फबाट पाँच वर्षका लागि ७५ करोड २४ लाख ५१ हजार बराबरको बजेट पेश गरिएको छ ।

जसमा शैक्षिक क्षेत्रमा १५ करोड ५५ लाख ५१ हजार, विद्यालयको भौतिक क्षेत्रमा ४१ करोड २७ हजार व्यवस्थापकिय क्षेत्रमा ३ करोड ६२ लाख ४ हजार र अन्य क्षेत्रमा १५ करोड ६ लाख ६९ हजार बराबरको खर्च गुरुयोजनामा समावेश गरिएको विद्यालयले जनाएको छ । उक्त बजेट सरकारी तथा आन्तरिक स्रोतबाट प्राप्त हुने अनुमान गरि गुरुयोजनामा समावेश गरिएको हो ।

आधुनिक पुस्ताकालय, प्रयोगशाल, छात्रावास र सभाकक्षको निर्माण गर्ने, विद्यालयलाई विद्यार्थी र अभिभावकको रोजाईको केन्द्र बनाउने, विद्यालयका स्रोत साधनहरुको परिचालन गरि आर्थिक रुपमा सबल एवं सक्षम बनाउने र प्राविधिक (कक्षा ९–१२) तर्फको कार्यक्रम सञ्चालन गर्ने पञ्चवर्षीय गुरुयोजनाको उद्देश्य रहेको छ ।

विद्यालयले तयार पारेको विद्यालय विकासको गुरुयोजना स्वीकृतिका लागि रेसुङ्गा नगरपालिकामा पठाउने विद्यालय व्यवस्थापन समितिका अध्यक्ष चुडामणि पन्थीले जानकारी दिए ।