काँग्रेसका संस्थापक वीपीलाई हानेको गोली थाप्‍ने लमजुङका नेता तारानाथको निधन

शुभेच्छा न्यूज संम्वाददाता
पोखरा। लमजुङ कांग्रेसका संस्थापक सभापति तारानाथ कोइरालाको निधन भएको छ। पेटसम्बन्धी रोगले थलिएका कोइरालाको पोखारास्थित मणिपाल अस्पतालमा मंगलबार बिहान निधन भएको हो।

७६ वर्षका कोइराला मणिपालमा पाँचदिन देखि उपचाररत थिए। मध्यनेपालको सिसाघाटमा उनको दाहसंस्कार गरिने नेपाली कांग्रेस लमजुङका सचिव हरि बरालले जानकारी दिए। २०३६ सालमा बीपी कोइरालालाई हानेको गोली थाप्दा कोइरालाले एउटा खुट्टा गुमाउन पुगे।

२०३६ साल असोज ८ गते स्याङ्जामा जनमत संग्रहको बेला भएको आमसभाबाट फर्कदा पुलिस र मण्डलेले बीपीलाई हानेको गोली उनले थापेका थिए। जिउँदो छँदा उनी भन्ने गर्थे, ‘मैले त्यतिबेला गोली नथापेको भए बीपी मर्नुहुन्थ्यो।’

लमजुङ कांग्रेसका संस्थापक सभापति (२०३३–०४६) कोइरालाले त्यसयता पार्टीमा कुनै जिम्मेवारी पाएनन। उनलाई पटक पटक पार्टीको आन्तरिक चुनावमा हराइयो।

पार्टी र राज्यबाट कुनै सहयोग नपाएपछि उनी गाउँघरमै दुःखजिलो गरेर जीवन बिताउँदै आएका थिए।