डाक्टर गोविन्द केसीद्धारा गण्डकी मेडिकल कलेज सञ्चालकलाई फौजदारी मुद्धा चलाउन माग

शुभेच्छा न्यूव संवाददाता 

पोखरा । डा. गोविन्द केसीले १७ औँ अनसनको चेतावनी दिएका छन् । चिकित्सा शिक्षा र स्वास्थ्य क्षेत्रमा सुधारको माग राख्दै पटक–पटक सत्याग्रह गर्दै आइरहेका डा.केसीले बुधबार विज्ञप्ति जारी गरेर यस्तो चेतावनी दिएका हुन् ।

प्रबुद्ध नागरिकहरुको आग्रहमा १६ औं अनसनका कार्यक्रम केही समयलाई स्थगित गरेको बताउँदै उनले चिकित्सा शिक्षा विधेयकमा १५ औं सत्याग्रहको बेला भएको सम्झौता अनुसार नै अगाडि बढ्न सरकारलाई ध्यानाकर्षण गराएका छन् ।

केसीले १५ औँ सत्याग्रहमा सहमति गरिएका अन्य माग पनि अबिलम्ब कार्यान्यवन गर्न माग समेत गरेका छन् ।
गण्डकी मेडिकल कलेज लगायत अन्य विभिन्न कलेजले विद्यार्थीहरुसँग चर्को अबैध शुल्क असुलेको विषयमा आफ्नो गम्भीर ध्यानाकर्षण भएको डा. केसीले बताएका छन् ।

केसीद्वारा जारी विज्ञप्तिमा भनिएको छ, ‘अबैध शुल्क उठाएको विषयमा विद्यार्थी आन्दोलनमा उत्रिँदा समेत नियमन निकायले ध्यान नदिनु दुर्भाग्यपूर्ण हो ।

शुल्कको विषयमा हामीसँग सम्झौता भई नेपाल सरकारले तोकेको शुल्क भन्दा बढी शुल्क असुल गर्ने कलेज संचालकलाई फौजदारी मुद्दा चलाएर कडा कारवाही गर्न माग गर्दछौं । साथै हाल आन्दोलनरत विद्यार्थीको माग प्रति ऐक्यबद्धता जनाउँदै, उनीहरुको माग अविलम्ब पूरा गर्न जोडदार माग गर्दछौं ।’

चिकित्सा क्षेत्रमा अनावश्यक चलखेल गरी २ वर्ष अगाडि नै महाभियोग लगाउन माग गरिएका अख्तियारका आयुक्त राजनारायण सिंह पाठकलाइ सो समयमा कारबाही नगरिएकाले हालको अवस्था आएको केसीको भनाई छ ।

पाठकको घुस प्रकरण चार महिना अगाडि नै प्रधानमन्त्री खड्ग प्रसाद ओली स्वयमले थाहा पाएर गुपचूप रहनु गम्भीर विषय भएको उनको भनाइ छ ।