अज्ञात समुहको गोली प्रहारबाट एक जनाको मृत्यु

बुट्वल। बुट्वलमा गोली प्रहार गरी एक जनाको हत्या गरिएको छ । बुटवल उपमहानगरपालिका वडा नं. १ मैनाबगर गढिटोलमा बुधबार बेलुका अन्दाजी वर्ष ४५ का एक पुरुषको गोली हानी हत्या गरिएको प्रहरीले जनाएको छ ।

गोली लागेर भारतिय नागरिक फिरोज खानको मृत्यु भएको प्रहरीले पुष्टि गरेको छ । अज्ञात समूहले गोली हानी हत्या गरेको बताइएको छ । उनी स्थानीय अटोभिलेजमा कार्यरत रहेका थिए । खानको छातीमा गोली लागेको छ । उनको शव लुम्बिनी प्रादेशिक अस्पताल बुटवलमा राखिएको बताइएको छ ।

घटना घटे लगत्तै प्रहरीले बुटवल नाका सिल गरी सुरक्षा जाँच कडा बनाएको छ । उनको कसले र किन हत्या गर्यो भन्नेबारे अनुसन्धान भइरहेको प्रहरीले जनाएको छ ।