पोखराबाट ठूलो परिणमको लागुऔषधसहित ७ पक्राउ

पोखरा । कास्की प्रहरीले ठूलो परिणामको लागु औषध सहित पोखराबाट सात जनालाई पक्राउ गरेको छ । कास्की प्रहरीको लागुऔषध निस्तेज पार्ने अभियान अन्तर्गत प्रहरी टोलिले पोखराको पृथ्वीचोक स्थित एक होटलबाट लागू औषध कारोबारी पक्राउ गरेको हो ।

लागू औषध कारोबार गरिरहेको गोप्य सूचनाको आधारमा ३ सय ४१ थान डाइजापाम, ३ सय ४१ थान फेनेरागन, ३ सय ४१ थान बुप्रिनर्फिन र १ सय थान नाइट्रोसन गरि १ हजार २ सय २८ थान लागू औषध बरामद गरिएको कास्की प्रहरी प्रमुख प्रहरी उपरीक्षक ओम बहादुर रानाले जानकारी दिए ।

प्रहरीले लागू औषध कारोबार गरिरहेका रुपन्देहीका ४३ बर्षिय रामबृक्ष कोहार, ४० बर्षकी तेतरी कोहार, २० बर्षकी सोनम कोहार, पोखरा १ का २६ बर्षिय अनिल गुरुङ, पोखरा २८ का २० बर्षिय शुक्रराज सुनार, पोखरा १३ का ४४ बर्षिय बिक्रम विक र पोखरा ३२ का ३४ बर्षिय अजय गुरुङ पक्राउ गरेको छ।

कोहार परिवारले शरिरका विभिन्न भागमा लुकाइछिपाइ ल्याइ पोखरामा रहेका ४ जना युवाहरुलाई लागुऔषध विक्री वितरण गर्ने क्रममा उनीहरुलाई पक्राउ गर्न प्रहरी सफल भएको कास्की प्रहरी प्रवक्ता प्रहरी नायव उपरीक्षक रविन्द्रमान गुरुङले जानकारी दिए । ‘अन्य केही युवाहरुको समेत संलग्नता रहेकोले उनीहरुको समेत खोजीकार्य जारी राखेका छौं’ उनले भने।