तालमिचेर भौतिक संरचना बनाउनेलाई पोखरा महानगरद्धार स्पष्टिकरण

पोखरा/पोखरा महानगरपालिकाले बेगनास ताल किनारमा मापदण्ड विपरीत नयाँ घर बनाएका स्थानीयसंग स्पष्टिकरण सोधेको छ ।महानगरले उनीहरूलाई पत्रमार्फत स्पष्टिकरण सोधेको हो । साथै ताल किनारमा घर बनाउन तत्काल रोक्न पनि महानगरपालिकाले निर्देशन दिएको छ ।

ताल किनारमा घर बनाइसकेकालाई भने घर बनाउनुको कारण कागजातसहित विवरण पेश गर्न निर्देशन दिएको छ ।महानगरपालिकाको मापदण्डमा बेगनास र रुपाताल किनारको सिमादेखि १ सय मिटर भित्र कुनै पनि भौतिक संरचना बनाउन नपाइने उल्लेख छ । यसमा फेवातालको मापदण्ड भने केही फरक छ ।

फेवातालको मापदण्ड ताल किनारबाट ६५ मिटर छ । अन्य साना तालको मापदण्ड ताल किनारबाट ५० मिटर रहने उल्लेख छ ।पोखरा महानगरका प्रमुख मानबहादुर जिसीका अनुसार बेगनास ताल किनारको मापदण्डभित्र पछिल्लो समयमा घर बन्नेक्रम तीब्र भएकाले त्यसलाई रोक्न पत्रचार गरिएको हो ।

महानगरपालिकाको मापदण्ड अनुसार काम गर्न मेयर जिसीले आग्रह गरे ।बेगनास ताल किनारमा पछिल्लो समयमा तालको मापदण्डभित्र २७ घर निर्माण भएको महानगरपालिकाले जनाएको छ ।

महानगरपालिकाका अनुसार बेगनासताल किनारको मापदण्ड भित्र व्यक्तिको लालपूर्जाको जग्गामा मात्र नभई तालको डुवानमा पर्ने जग्गाको मुआब्जा जग्गाधनीले लिइसकेका छन् ।