धार्मिक पर्यटन समृद्धिको प्रमुख आधार ; पर्यटनमन्त्री लम्साल

पोखरा। गण्डकी प्रदेशका उद्योग, पर्यटन, वन तथा वातावरणमन्त्री विकास लम्सालले धार्मिक पर्यटन समृद्धिको प्रमुख आधार रहेको बताएका छन्।

तनहुँको व्यास नगरपालिका–४ स्थित तनहुँ कालिका सहिद शान्तिपार्क भित्र निर्माणाधीन कालिका मन्दिरमा मूर्ति प्रतिस्थापन गर्न आज आयोजित कार्यक्रममा बोल्दै मन्त्री लम्सालले सो कुरा बताएका हुन्। उनले धार्मिक पर्यटन महत्वपूर्ण रहेको चर्चा गर्दै मठमन्दिर संरक्षणका लागि प्रदेश सरकार लागिपरेको बताए।

सहिद शान्ति पार्कलाई धार्मिक पर्यटकीय गन्तव्यको रुपमा विकास गर्न मन्दिर निर्माणले महत्वपूर्ण योगदान गरेको बताउँदै मन्त्री लम्सालले मन्दिरको निर्माण कार्यमा प्रदेश सरकारको तर्फबाट सहयोग रहने प्रतिबद्धता जनाए।

विकास निर्माणमा सर्वसाधारणको सहकार्य अत्यन्तै सकारात्मक रहेको उल्लेख गर्दै मन्त्री लम्सालले विकास प्रति सर्वसाधारणको लगावले सरकारलाई काम गर्न प्रेरणा दिने चर्चा गरे।

मन्त्री लम्सालले काठमाडौबाट पोखरा आउने पर्यटकलाई दमौलीमा झारेर मन्दिरसम्म आउने वातावरण सिर्जना गर्नुपर्ने बताए। गण्डकी प्रदेश सांसद डोवाटे विश्वकर्माले पर्यटनबाटै समृद्धि सम्भव रहेकोले तनहुँ कालिका मन्दिरले उक्त लक्ष्य पूरा गर्न सहयोग पु¥याउने बताइन्।

गण्डकी प्रदेश सांसद सरिता गुरुङले धर्म संस्कृति संरक्षण गर्नु अहिलेको आवश्यकता रहेको बताउँदै धर्मलाई पर्यटनसँग जोडेर अगाडि बढाउनुपर्नेमा जोड दिइन।