वडा अध्यक्षमाथी हातपात गर्ने विरुद्ध सार्वजनिक मुद्धा

पोखरा । पोखरा महानगरपालिका वडा नं.२१ का वडा अध्यक्ष खगराज आचार्य माथी हातपात गर्ने विरुद्ध प्रहरीले सार्वजनिक मुद्धा दर्ता गराएको छ ।

आइतवार साँझ पोखराको राष्ट्रबैङ्कचोकमा जुस खाईरहेको बेला ‘कृस्ती–निर्मलपोखरी–भरतपोखरी’ सहलगानी खानेपानी आयोजनाका अध्यक्ष दाताराम आचार्यले वडाअध्यक्षमाथि हातपात गरेपछि उनलाई प्रहरीले नियन्त्रणमा लिएको थियो ।

वडा प्रहरी कार्यालय बैदामका प्रमुख एवं डिएसपी कोमल शाहका अनुसार वडाअध्यक्ष खगराज माथी हापात गर्ने दाताराम बिरुद्ध जिल्ला प्रशासन कार्यालय कास्कीबाट म्याद थप गरी आज (सोमबार) सार्वजनिक मुद्धा चलाइएको छ ।

ब्यक्तिगत रिसीवीका कारण दाताराम आचार्यले आइतबार पोखराको राष्ट्रबैंक चोकमा हातपात गरेपछि वडा अध्यक्ष आचार्यले वडाप्रहरी कार्यलय बैदाममा उजुरी दिएका थिए । पटक–पटक आफुमाथी दातारामले अनावस्यक दबाब दिदै गालीगलौज गर्दै आएको अध्यक्ष आचार्यले बताए ।

‘कृस्ती–निर्मलपोखरी–भरतपोखरी सहलगानी खानेपानी आयोजनाको विषयलाई लिएर दातारामले रिसीबी पालेका रहेछन,’ उनले भने, ‘मैले खानेपानी आयोजनाको लागि अनुगमन समिति बनाउनुपर्छ भनेको थिएँ । तर, दातारामले मानेका थिएनन् । यहि विषयलाई लिएर उनले मलाई हातपात गरे ।’

वडा अध्यक्षले खानेपानी आयोजनाको अनुगमन समिति बनाउनुपर्ने बताएपनि योजनाको अध्यक्ष रहेका दातारामले बनाउन मानेका थिएनन् । त्यसै बिषयलाई लिएर वडाअध्यक्ष र दातारामबीच चुलीएको बिवादले उग्ररुपलिए पछि हातहाल्ने अवस्थामा पुगेको हो।