पोखराबाट नक्कली सुनको मुर्ती बेच्ने तीन पक्राउ

पोखरा । सर्वसाधारणलाई सुनको मुर्ती भन्दै झुक्काएर नक्कली मुर्ती बचेर ठगी गरेको आरोपमा प्रहरीले पोखराबाट तीन जनालाई पक्राउ गरेको छ ।

सुनको मुर्ती भन्दै सुन जस्तै देखिने पहेलो मुर्ति देखाएर ठगी गरेको आरोपमा पक्राउ गरिएका अभियुक्तलाई जिल्ला प्रहरी कार्यालय कास्कीले आइतबार पत्रकार सम्मेलनको आयोजनागरी सार्वजनिक गरेको हो ।

पोखरा महानगरपालिका वडा नम्बर ८ बस्ने पाराश्वर विश्वकर्मालाई १३ लाखमा मुर्ति बेचेर ठगी गरेको आरोपमा उनीहरुलाई पक्राउ गरिएको जिल्ला प्रहरी कार्यलय कास्कीमा प्रमुख एसपी दानबहादुर कार्कीले बताए ।

बिश्वकर्माले मुर्ति खरिद गरेपछि नक्कली सुनभएको पत्तोपाए लगत्तै साउन १९ गते जिल्ला प्रहरी कार्यलयमा आफू ठगीएको भन्दै उजुरी गरेका थिए । उजुरी पछि प्रहरीले उनीहरुलाई साउन २७ मा पोखराको डिहिकोपाटनबाट पक्राउ गरेको थियो ।

ठगी गरेको आरोपमा प्रहरीले दोलखा भिमेश्वर नगरपालिका १ घर भई हाल काठमाडौंको सिनामंगल बस्ने बर्ष ५२ का नवराज पाण्डे, (रामराज शिवाकोटी), गोरखा भिमसेन नगरपालिका १ घर भई हाल पोखरा न्युरोडमा बस्दै आएका ३३ वर्षिय (देव कुमार श्रेष्ठ) रमेश श्रेष्ठ र रामेछाप भगेरी गाउँपालिका ५ घर भै हाल काठमाडौं ६ बौद्ध बस्ने बर्ष ३६ का देवराज प्रधान (वसन्त बाबु श्रेष्ठ) लाई पक्राउ गरिएको छ ।

प्रहरीले अभियुक्तको साथबाट सुन जस्तै देखिने पहेलो ६ किलो १ सय ग्राम तौलको बुद्धको मुर्ति, धातु छेड्न प्रयोग गरिने ड्रिल मेसिन,सुन जस्तो देखिने पहेलो धुलो, २ भारतीय क्यासिनो कार्ड, राजदुताबास काठमाडौं लेखिएको कार्ड १ थान, भारतिय निर्वाचन आयोगको कार्ड १ थान र विभिन्न बैंकका चेकहरु समेत बरामद गरेको जनाएको छ ।

मुर्तिमा सुन जस्तो देखिने धुलोको लेप लगाए पछि सुन जस्तै देखिने भएका कारण मुर्ति खरिद गर्नेहरु ठगिएको कास्कीका प्रहरी प्रमुख एसपी दानबहादुर कार्कीले बताए । ‘ सुन जस्तो धुलो लगाइसकेपछि सुनको जस्तै रंग देखिने रहेछ,’ उनले भने, ‘सुन पसलमा गएर चेक गर्दा पनि केहीमात्रा सुन मिसाइएका कारण सुन नै देखिदो रहेछ ।’