पर्वतमा ढिस्कोले पुरिएर सब ओभरसियरको मृत्यु

पोखरा । मध्यपहाडी लोकमार्ग अन्तर्गत पर्ने पर्वत सडकखण्डमा सडक बिस्तारको काम गरिरहेको बेला माटोको ढिस्कोले पुरिएर कुस्मा नगरपालिकामा एकजना सबओभरसियरको मृत्यु भएको छ।

सडक बिस्तारको काम गरिरहेका बेला माथिबाट खसेको माटोको ढिस्कोले पुरिएर मोरङ स्थाइ ठेगाना भएका २३ वर्षीय सबओभरसियर कमल राईको मृत्यु भएको जिल्ला प्रहरी कार्यालय पर्वतका डिएसपी स्यामु अर्याले जानकारी दिए।

कुस्मा नगरपालिका–७ खरेहामा मध्यपहाडी लोकमार्गको स्तरोन्नतिको काम भइरहेको बेला अकस्मात सडक माथिको माटोको ढिस्को खस्दा राईको पुरिएर मृत्यु भएको हो ।

जिल्ला प्रहरी कार्यालय पर्वतका टोली र सशस्त्र प्रहरीको संयुक्त टोलीले एक्साभेटरको सहयोगले उनको शब बाहिर निकालेको छ। शवलाई पोष्टमार्टमको लागि पर्वत जिल्ला अस्पतालमा राखिएको छ।