जलकुम्भीले कुरूप बन्दै फेवाताल, डुंगा चलाउनै सकस

बाढीपहिरो र जलकुम्भीका कारण फेवाताल कुरूप बनेको छ । फेवातालमा भरिएका जलकुम्भी झारका कारण पोखरा घुम्न आएका पर्यटक सहज रूपमा डुंगामा शयर गर्न पाएका छैनन् ।

जलकुम्भीसँगै बाढी पहिरोले बगाइल्याएका मुढा, लेदोले फेवाताल कुरूप बनेपछि डुंगा चलाएर जीविकोपार्जन गर्दै आएका व्यवसायी रोजीरोटी समेत खोसिने चिन्तामा छन् । फेवातालको सिरानमा पर्ने हर्पन खोला र खहरे खोलाको बाढी सीधै फेवातालमा मिसिन्छन् ।

डुंगा चलाउनै जोखिम हुनेगरी फेवाताल फोहोर बनेको डुंगा व्यवसायी विनोद जलारीले बताए । ‘तालको चारैतिर फैलिएको जलकुम्भीले तालको सुन्दरता हराएको छ,’ उनले भने । डुंगा चलाउनै नमिल्नेगरी जलकुम्भी फैलिएपछि तालबाट बजार आउने र घर फर्किने स्थानीयवासी पनि समस्यामा परेका छन् ।

तालपारीका गाउँलेहरू घरेलु उत्पादन डुंगामार्फत पोखरा बजारसम्म विक्रीका लागि ल्याउने र दैनिक आवश्यक वस्तु खरीद गरी फर्कने गर्दछन् । तर जलकुम्भीले ताल भरिएपछि उनीहरूको आवतजावत नै रोकिएको छ । तालमा बाक्लो फैलिएको जलकुम्भी झारका कारण दैनिक डुंगामार्फत दूध बजारसम्म ल्याउन सकस परेको पुम्दी सिम्लेपात्लेका किसान गुरुदत्त बरालले बताए ।

स्थानीय संघसंस्था, डुंगा व्यवसायी समिति, सुरक्षाकर्मी, स्थानीय आमा समूहलगायतले वर्षेनि जलकुम्भी झार तालबाट निकाल्दै आएका छन् । गत वर्षदेखि भने पोखरा महानगरपालिकाले मेशिनबाट जलकुम्भी झार फाल्ने गरेको छ । पर्यटकीय मौसम शुरू भएको बेलामा फेवाताल जलकुम्भीले ढाकिएपछि पर्यटन व्यवसायी चिन्तित छन् । मेशिनकै भरमा नियमित जलकुम्भी हटाउने हो भने करीब डेढ महीनाभन्दा बढी समय लाग्ने अपरेटर सरोज पुनले बताए ।

‘मेशिनले मात्रै जलकुम्भी फाल्न झन्डै दुई महीना लाग्छ,’ पोखरा महानगरपालिका फेवाताल संरक्षण आयोजनाका सुपरभाइजर ध्रुवबहादुर गोदारले भने । फेवाताल नजीकको किनारा र मुहानतर्फका क्षेत्रमा अव्यवस्थित रूपमा खनिएको मोटरबाटोका कारण वर्षैपिच्छे बाढीपहिरो आउने क्रम बढेको लेकसाइडका होटल व्यवसायी सन्दीप बरालले बताए ।

उनका अनुसार वर्षैपिच्छे बाढी पहिरो, जलकुम्भी र मानव अतिक्रमणका कारण स्वच्छ फेवाताल कुरूप बन्दै गएको छ । फेवाताल सरसफाइका नाममा सक्रिय विभिन्न संघसंस्था र फेवाताललाई आधार बनाएर व्यवसाय गर्नेहरू फेवा बचाउन सक्रिय हुनुपर्ने उनको भनाइ छ ।