निर्धक्क बाँच्न पाउने हकमाथि षड्यन्त्र भयो ;सभापति देउवा

पाली कांग्रेसका सभापति एवं पूर्व प्रधानमन्त्री शेरबहादुर देउवाले वर्तमान सरकार प्रजातान्त्रिक तरिकाबाटै निर्वाचित भएपनि प्रजातान्त्रिक हक अधिकारलाई संकुचन गर्न खोजेको आरोप लगाएका छन् ।

पार्टीको भ्रातृ संस्था नेपाल तरुण दलले आफ्नो स्थापनाको ६६ औं स्थापना दिवसका अवसरमा आइतवार आयोजना गरेको शुभकामना आदानप्रदान कार्यक्रममा उनले संघीय लोकतान्त्रिक गणतन्त्र नेपालको रक्षा र राष्ट्रिय एकता तथा अखण्डतालाई अक्षुण्ण राख्न तरुण दल र विद्यार्थीको काँधमा महत्त्वपूर्ण जिम्मेवारी आएको बताए ।

सभापति देउवाले भने, ‘प्रजातन्त्रमा सबैभन्दा महत्त्वपूर्ण विषय विचार तथा अभिव्यक्तिको स्वतन्त्रता, वाक स्वतन्त्रता, सम्पत्तिको हक, स्वाभिमानका साथ निर्धक्कसँग बाँच्न पाउनेलगायत हक हुन् । यसमा षड्यन्त्र हुन लागेको छ । त्यसविरुद्ध लड्न सम्पूर्ण युवा तरुणको भूमिका महत्वपूर्ण हुन्छ । अब तपाईंहरूको काँधमा बढी जिम्मेवारी आएको छ ।’

लोकतन्त्रको रक्षा र सुदृढीकरणमा तरुण दल ठूलो उत्साहका साथ लागेको भन्दै उनले तरुण दलको नेतृत्वको प्रशंसासमेत गरे । उनले भोलिका दिनमा आउने थप चुनौतीको सामना गर्न तरुण दललाई अझ सशक्त र जुझारु संगठन बनाउन सुझाव दिए ।