गण्डकी प्रदेश प्रमुखले थाले काम

गण्डकी प्रदेशका प्रदेश प्रमुख अमिक शेरचनले बुधबार पदभार ग्रहण गरेका छन् । प्रदेश प्रमुख शेरचनलाई गण्डकी प्रदेशका कार्यवाहक मुख्य मन्त्री किरण गुरुङले पोखरा विमानस्थलमा स्वागत गरेका थिए ।

विमानस्थलबाट प्रदेश प्रमुखको कार्यालयमा पुगेर प्रदेश प्रमुख शेरचनले पदभार ग्रहण गरेका हुन् । पदभार ग्रहणसँगै प्रदेश प्रमुख शेरचनले नेपालको संघीय लोकतान्त्रिक गणतन्त्र विश्वका विभिन्न देशको भन्दा विशिस्ट भएकाले सबै मिलेर सफल कार्यान्वयन गर्नुपर्ने बताए ।

देशमा देखापरेको संकट निवारणमा समझदारी र सहमतिमार्फत भूमिका खेल्ने उनको भनाइ थियो । गरिबी, बेरोजगारी, देशको मूल समस्या भएको भन्दै त्यसको निराकरण गर्दै अघि बढ्नुपर्ने उनले बताए । सम्पूर्ण नेपाली जनताको, राजनीतिक दलहरूको, तत्कालीन आन्दोलमा सहभागी सबै सहयात्रीहरूको समझदारी र सहमतिमा मुलुकको राष्ट्रियता, सार्वभौमिकतालाई जोगाउने दिशातर्फ जानुपर्ने उनको धारणा थियो ।

पदभार ग्रहण गर्नुअघि प्रदेश प्रमुखको कार्यालयमा नेपाली सेनाले प्रदेश प्रमुखलाई सलामी अर्पण गरेको थियो । पदभार ग्रहण समारोहमा कार्यवाहक मुख्य मन्त्री किरण गुरुङ, सभामुख नेत्रनाथ अधिकारीलगायत विशिस्ट व्यक्तिहरूको उपस्थिति थियो ।