कालिगण्डकीमा मोटरसाईकल खस्दा पर्यटकको मृत्यु

पोखरा देखि म्याग्दी हुँदै मुस्ताङ आउदै गरेका मोटर साईकलमा सवार एक विदेशी पर्यटक आईतबार म्याग्दी र मुस्ताङको सीमाक्षेत्र तल्लो घाँसा नजिक राष्ट्रिय गौरवको निर्माणधिन बेनी – जोमसोम सडकबाट ३ सय मिटर तल कालिगण्डकी नदीमा खस्दा मृत्यु भएको जिल्ला प्रहरी कार्यालय मुस्ताङले जनाएको छ ।

एचपि ५८ ए ३८६० नम्बरको मोटरसाईकल यात्राका क्रममा अनियन्त्रित भई सडकबाट खसेको मुस्ताङका प्रहरी प्रबत्ता आशिष अधिकारीले जानकारी दिए । उनका अनुसार पार्सपोर्ट नम्बर ५२५९५८६४ उल्लेख भएको वर्ष ६० का स्कटल्याण्डका पर्यटक फानीको आईतबार साझनै एयर डाईनेष्टिक हेलीबाट मणिपाल शिक्षण अस्पतालमा पुर्‍याई उपचार गर्ने क्रममा मृत्यु भएको हो । दुर्घटना आईतबार दिउसो ३ बजे भएको थियो ।

मुस्ताङ यात्रामा रहेका मोटर साईकलमा सवार फानीको अनुहार र हातमा गम्भिर चोटपटक लागेको थियो । दुर्घटना भएको स्थान मुस्ताङ सदरमुकाम जोमसोम देखि ३५ किलोमिटर दक्षिणमा पर्छ ।

दुर्घटनामा परी ज्यान गुमाएका स्कल्याण्डका पर्यटक फानी सहित उनका ८ जना साथीहरु मोटरसाईकल चढेर मुस्ताङ आउदै गरेको प्रहरीको भनाई छ । उनीहरुको टोलीमा चिकित्सक समेत भएको जनाईएको छ । दुर्घटनामा परी घाईत भएका फानीलाई नदीबाट सडकमा ल्याई प्राथमिक उपचार समेत गरिएको थियो ।