सरकारले अख्यितारलाई शाही आयोग जस्तो बनाउन खोज्दैछ :सभापति देउवा

नेपाली कांग्रेसका सभापति शेरबहादुर देउवाले सरकारले अख्तियार दुरुपयोग अनुसन्धान आयोगलाई ‘शाही’ आयोग बनाउन खोजेको आरोप लगाएका छन्।

डेमोक्रेटिक लयर्स एसोसिएसनले पोखरमा गरेको कार्यक्रममा बोल्दै उनले यस्तो बताएका हुन् ‘सरकारले अख्यितारलाई शाही आयोग जस्तो बनाउन खोज्दैछ’, उनले भने, ‘यो हामीलाई सह्य छैन, हामी लडाईं लडेर छाड्छौँ।’

सभापति देउवाले संवैधानिक परिषद्लाई कठपुतली बनाएर आफ्ना मान्छे भर्ती गर्न सरकार लागि परेको आरोप लगाए। संवैधानिक परिषदमा सहमतिको बाटो छाडेर सरकारले एकलौटी गर्न थालेको उनको भनाइ थियो।

अब कांग्रेसले सदन र सडकमा यसको विरोध गर्ने चेतावनी दिए। कांग्रेसले कुनै पनि हालतमा उक्त अध्यादेश पास हुन नदिने दाबी गरे।

केपी शर्मा ओली नेतृत्वको सरकारले नागरिकका अधिकार खोसेर प्रजातन्त्रलाई नै कमजोर बनाउन लागेको आरोप लगाए। राष्ट्रवादी भनेर चिनिएका प्रधानमन्त्री ओलीको राष्ट्रवाद अहिले कालापानी र लिम्पियाधुरामा देखिएको टिप्पणी गरे।