देउवालाई सञ्चारमन्त्रीको जवाफ : हामीले पनि गम्भीर प्रश्न उठाउनुपर्ने बेला भयो

सरकारका प्रवक्ता एवं सञ्चार तथा सूचना प्रविधिमन्त्री गोकुल बाँस्कोटाले कांग्रेस सभापति शेरबहादुर देउवालाई सम्हालिएर बोल्न चेतावनी दिएका छन् ।

प्रधानमन्त्री केपी शर्मा ओलीसँगै सल्लाह गरेरै भारतले कालापानी र लिपुलेक समावेश गरिएको नयाँ नक्सा सार्वजनिक गरेको आरोप देउवाले लगाएका थिए । सञ्चारमन्त्री बाँस्कोटाले यस्तो आरोप सैह्य नहुने बताउँदै सम्हालिएर बोल्न चेतावनी दिएका हुन् ।

आइतबार पोखरामा पत्रकारसँगको भेटघाटमा बाँस्कोटाले ओलीमाथि लगाएको आरोप प्रमाणित गरेर देखाउन देउवालाई चुनौतीसमेत दिए । ‘उहाँले के आधारमा प्रधानमन्त्रीमाथि आरोप लगाउनुभयो त्यो मलाई थाहा भएन,’ बाँस्कोटाले प्रश्न गरे, ‘के उहाँले यो आरोप प्रमाणित गर्न सक्नुहुन्छ ?’

उनले अब देउवाबारे पनि सरकारले प्रश्न उठाउने अवस्था आउन सक्ने चेतावनी दिए । ‘उहाँले सत्य बताउनुभएको नै हो भने उहाँको विषयमा पनि हामीले गम्भीर प्रश्न उठाउनुपर्ने भयो ।’

भारतको नयाँ नक्सा बनाउन प्रधानमन्त्री केपी शर्मा ओलीको संलग्नता रहेको भन्नेहरूले कसरी भयो भन्ने कुरा प्रमाणसहित पेश गर्नुपर्ने उनको भनाइ छ । १४ मंसिरमा हुन लागेको कास्की– २ को उपनिर्वाचनको चुनावी सभालाई सम्बोधन गर्न शनिबार पोखरा पुगेका देउवाले भारतले हालै बनाएको नयाँ राजनीतिक नक्सामा ‘कालापानी र लिपुलेक’ प्रधानमन्त्री केपी शर्मा ओलीको सहमतिमा राखिएको बताएका थिए ।

सोही आरोपको खण्डन सञ्चारमन्त्री बाँस्कोटाले आइतबार पोखरामा नै गरेका हुन् ।