लोकदोहोरी प्रतिष्ठानको अध्यक्षमा रमेश विजि विजयी

राष्ट्रिय लोक तथा दोहोरी गीत प्रतिष्ठानको अध्यक्षमा रमेश विजि निर्वाचित भएका छन्। पोखरामा भएको सातौँ केन्द्रिय महाधिवेशनमा उनले बिष्णु खत्रीलाई ३९ मतको अन्तरले पराजित गरेका हुन् ।

विजिले ५ सय ८४ मत ल्याएका थिए भने खत्रीले ५ सय ४५ मत प्राप्त गरेका छन् । यस्तै कोषाध्यक्षमा राजु ढकाल विजयी भएका छन् । उनले तारापती सुवेदीलाई पराजित गरेका हुन् । ढकालले ७ सय ३७ मत प्राप्त गरेका छन भने सुवेदीले ३ सय ७२ मत ल्याएका छन् ।

केही पदको लागि भने कलाकारहरु निर्विरोध चयन भएका थिए । वरिष्ठ उपाध्यक्षको लागि गायिका रीता थापामगर निर्विरोध निर्वाचित भएकी छिन् ।त्यस्तै, प्रथम उपाध्यक्षमा गायक पशुपति शर्मा निर्विरोध निर्वाचित भएका छन् । द्धितिय उपाध्यक्षमा रामजी खाँड चुनिएका छन्। महिला उपाध्यक्षको कोटामा गायिका राधिका हमाल निर्विरोध निर्वाचित भएकी छन् ।

महासचिव, उप महासचिव र सांगठनिक सचिव पदमा पनि कलाकारहरु निर्विरोध चुनिएका छन् । सुवास केसी प्रतिष्ठानको नयाँ सचिव बनेका छन् भने शंकर वीसी र शिव हमाल उप–सचिव निर्वाचित भएका छन् ।सांगठनिक सचिव तर्फ खुमन अधिकारी निर्विरोध भए । महिला सचिवको पदमा जमुना राना मगर निर्विरोध निर्वाचित भएकी छिन् ।

१३ सय ४८ जना कूल मतदाता रहेकोमा ११ सय ३७ मत खसेको थियो । अधिवेशन तीन दिन सम्म चलेको थियो ।