युवा उद्यमीसँग रोट्रयाक्टरको भेला

विभिन्न व्यवसायमा आबद्ध ३० वर्षमुनिका दुई सय पचास भन्दा बढि युवाहरु । चर्चित युवा उद्यमी शिक्षित भट्ट, अहमद दुल्ला, पर्यटन उद्यमी कर्ण शाक्य, आनन्दराज मुल्मी, नायिका करिश्मा मानन्धर, युवा व्यवसायी अर्जुन पोखरेल ।

शनिबार पोखरामा भेला भएका यी युवाहरुको समूहलाई यिनै युवा उद्यमीहरुले आफ्ना उद्यमका अनुभव सुनाए । उद्यमी बन्न चाहने युवाहरुलाई बिजनेश टिप्स र सक्सेस मन्त्रहरु सुनाए ।

रोट्रयाक्ट डिष्ट्रिक जोन ४ ले आयोजना गरेको यस कार्यक्रममा रोट्रयाक्टरहरु सहित बाह्य क्षेत्रका उद्यमी तथा युवाहरु सहभागी थिए ।भेला सुरु भयो । उद्यमीहरुले आफ्ना अनुभवहरु शेयरिङ गरे । सहभागीका प्रश्न सुने र जवाफ दिए ।

‘जीवन यथार्थ हो ।’ व्यवसायी कर्ण शाक्यले युवाहरुलाई सुनाए, “शैक्षिक प्रमाणपत्रले मानिस नोकर बन्छ, मालिक बन्न आफै व्यवसाय गर्नैपर्छ, गल्ती गर्नैपर्छ ।”

उनले जवाफ दिनुको पछाडि सहभागीहरुले सफलता र शिक्षाको बारेमा प्रश्न गरेका थिए ।“म पढाईमा लद्धु थिएँ, मलाई अहिलेसम्म हिसाब आउँदैन, १२ पास भइसकेपछि केही लक्ष्य थिएन ।” द फ्याक्ट्री टिमका सञ्चालक अहमद दुल्लाले व्यवसायी सुरुवातीका अनुभव सुनाए ।

अहिलेका चर्चित जुत्ता व्यवसायी दुल्लालाई सुरुवातमा परिवारले पनि साथ दिएन । विदेश गएर कमाउ भन्ने सुझाव परिवारले दिन्थे, सानो जातले गर्ने काम भनेर पनि उनलाई होच्याउने गरिन्थ्यो । उनको अनुभव छ ।

चर्चा र बहसमा छ टुटल । राइड सेयरिङ एप टुटलका को–फाउण्डर शिक्षित भट्टले युवालाई शिक्षित गरे, “टुटल मोबिलाइजेसनको कुरा हो ।”

सहभागीहरुले टुटलका अहिलेको अवस्थाको बारेमा प्रश्न सोधे र भट्टले जवाफ दिए । अन्तरक्रिया गरे । टुटल सुरु गनुपूर्व जागिरे जीवन छाडेको अनुभव सुनाए ।

फरकफरक सेसनमा शनिबार करिब ६ घण्टा उद्यमी बन्न ईच्छुक युवा र युवा उद्यमीको अन्तरक्रिया चल्यो ।पोखरा उद्योग वाणिज्य संघका महासचिव अर्जुन पोखरेलले नीतिगत प्रक्रियाका बारेमा युवाहरुलाई जानकारी दिए । नेष्डो नेपालका सञ्चालक विश्वप्रसाई ठकुरीले वित्तीय साक्षरताको बारेमा सहजीकरण गरे ।

उद्यम गर्न चाहने युवाहरुलाई लक्षित गरेर कार्यक्रम आयोजना गरिएको रोट्रयाक्ट जोन ४ का जेडआरआर सुदिप प्रसाई ठकुरीले जानकारी दिए ।