कास्कीको रिभानमा महिलाको हत्या गरेर फरार भएको युवा पक्राउ

वृद्धा महिलाको हत्या गरेको आरोपमा कास्की प्रहरीले एक युवालाई पक्राउ गरेको छ ।कास्कीको माछापुच्छ्रे गाउँपालिका वडा नम्बर ५ रिभानकी ६६ बर्षीया चिजा कुमारी विकको हत्या गरेको आरोपमा प्रहरीले म्याग्दीका खिमबहादुर श्रीपालीलाई पक्राउ गरेको हो ।

विकको हत्या आरोपमा म्याग्दी धवलागिरी गाउँपालिका ५ घर भई पोखरा २५ हेम्जामा बस्दै आएका ३९ बर्षीय खिमबहादुर श्रीपालीलाई पक्राउ गरिएको जिल्ला प्रहरी कार्यलय कास्कीका प्रमुख एसपी दानबहादु कार्कीले बताए।

विकको पुस ६ गते राती हत्या भएको थियो । हत्या गरेर भागेका श्रीपालीलाई प्रहरीले तनहुँको व्यास नगरपालिकाबाट शनिबार पक्राउ गरेको हो । वृद्धा बिकको गरगहना चोरेर हत्या गरी फरार भएका श्रीपालीलाई तनहुँबाट पक्राउ गरिएको प्रहरी प्रमुख एसपी कार्कीले बताए।

चिजाको घरमा पुगेर रक्सी खाएर राती नै हत्या गरेको अनुसन्धानबाट खुलेको उनले बताए । श्रीपालीले चिजाको हत्या गरेर शवलाई ६ वटा शिरक र कम्मलले छोपेर घरको ढोकामा ताल्चा लगाएर फरार भएको प्रहरी प्रमुख एसपी कार्कीले बताए ।‘चिजाको हत्या भएको स्थानबाट करिब २ केजीको ढुंगा समेत फेला परेको छ’ उनले भने ।

ढुंगाले टाउकोमा प्रहार गर्दा उनको हेड इन्जुरि भएर मृत्यु भएको उनको भनाई छ । श्रीपालीको साथबाट हालसम्म डेढ तोला सुन मात्र बरामत भएको प्रहरीले जनाएको छ ।

श्रीपालीले बिक्रि गरेको सुन खरिद गर्ने सुन पसलका संचालकलाई अपराधिक गतिविधिमा संलग्न भएको आरोपमा पक्राउ गरिएको एसपी कार्कीले बताए ।