असन्तुष्ट जिल्ला सभापतिहरुलाई देउवाले दिए ‘ब्रेकफास्ट’को निम्तो

नेपाली काँग्रेसका सभापति शेरबहादुर देउवाले तीन दिनेदेखि पार्टी कार्यालय सानेपामा भेला भएका असन्तुष्ट जिल्ला सभापतिहरुलाई बिहीवार बिहान ‘ब्रेकफास्ट’को निम्तो दिएका छन्।

वरिष्ठ नेता रामचन्द्र पौडेल, महामन्त्री शशांक कोइराला, नेता प्रकाशमान सिंह, नेता कृष्णप्रसाद सिटौलालगायतका नेताहरुले राय लिन सानेपामा बोलाएका जिल्ला सभापतिहरुलाई देउवाले ब्रेकफास्टको निम्तो दिएका हुन्।

‘भोलि ब्रेकफास्टका लागि सभापतिले बोलाउनु भएको छ, हामी सबै जाँदैछौं,’ नुवाकोटका कांग्रेस जिल्ला सभापति जगदीश नरसिंह केसीले भने।

मंगलवारबाट शुरु भएको असन्तुष्ट पक्षको जिल्ला सभापतिहरुको भेला आज सकिएको छ। भेलामा ५२ बढी जिल्लाका जिल्ला सभापतिहरु भेला भएको पौडेल पक्षले दाबी गरेको छ।

सभापति देउवाले पुस ११ गते बहुमतको आधारमा महाधिवेशनको कार्यतालिका सार्वजनिक गरेपछि पौडेललगायत नेताहरु रुष्ट बनेका थिए। रुष्ट नेताहरुले देउवाको कदमविरुद्ध रणनीति बनाउन सानेपामा जिल्ला सभापतिहरुको भेला राखेका थिए।