अन्नपूर्ण पदमार्गमा अलपत्र चार पर्यटकको नजिक पुगे स्थानीय युवा

म्याग्दीको अन्नपूर्ण गाउँपालिका–४ नारच्याङको हुदै खोप्रा जाने माथिल्लो पदमार्गमा चार जना पर्यटकहरु अलपत्र परेका छन् ।

खोप्राबाट बिहिबार बिहान ११ः३० बजे खोप्रामा खाना खाएर हिडेका अंकीत शाह समेत चार जना नेपाली पर्यटक बाटो विराएर अल्पत्र परेका छन् ।

पर्यटकीय स्थल खोप्रालेकबाट नारच्याङ गाउँ झर्दै गर्दा बाटो बिराएर चार जना पर्यटकहरु विहिवारदेखि अल्पत्र परेका हुन् । अल्पत्र परेका पर्यटकहरुमा अंकीत शाह सहित १ जना पोखरा र ३ जना काठमाण्डौका बासीन्दा रहेको प्रमुख जिल्ला अधिकारी ज्ञाननाथ ढकालले जानकारी दिए ।

हिउँले बाटो ढाकिएको कारण बाटो विराएर जंगलतर्फ अप्ठ्यारो भुभागमा अल्पत्र परेको जानकारी आएपछि खोजीकार्यका लागि स्थानीय दुई युवाहरुसंगै प्रजिअ ढकाल, प्रहरी नायब उपरिक्षक किरणजंग कुँवर र सशस्त्र प्रहरी समेतको टोली अल्पत्र परेका पर्यटकको खोजीको लागि खोप्रा तिर लागेको थियो ।

हिउँका कारण उनीहरुको खोजी कार्यमा कढिनाई भएको प्रजिअ ढकालले बताए । बिहान देखी उनीहरुको खोजी कार्य भएता पनी उनीहरुको उद्धार गर्न नसकिएको प्रजिअ ढकालको भनाई छ ।

उनीहरु संग निरन्तर मोवाईल सम्पर्क गरि खोजीकार्य शुक्रबार दिन भरि तिब्र पारिएको थियो । ‘सम्भव भएसम्म आगो बालेर धुवा मार्फत संकेत दिन अनुरोध गरेका थियो’ प्रहरी उपरिक्षक कुवरले भने, स्थानीय दुई युवाहरुको टोलीले आज साँझ उनीहरुको आवाज सुन्ने ठाउँ सम्म पुगेका छन् ।

‘स्थानीय दुई युवाको टोली उहाँहरुको आवाज सुन्ने ठाउँमा पुगेको जानकारी आएको छ’ कुंवरले भने, रातको समयले गर्दा प्रजिअहरुको टोली त्यस ठाउँ सम्म पुग्न नसकेर आजको लागि नजिकको बस्ती घिरच्याङमा बास बस्नको लागि फर्किएको छ ।