के अब जग्गाको मूल्य ह्वात्तै घट्ने हल्ला साँचो हो ?

माघ १ गतेदेखि बैंकहरुमा गो–एएमएल प्रणाली लागू भएपछि जग्गाको मूल्य ह्वात्तै घट्ने हल्ला चलाइएको छ ।

कालोधनले जग्गाकारोबार गरेर सम्पत्ति शुद्धिकरण गर्नेहरुका लागि सरकारले लगाएको नयाँ नियमले जग्गाको मूल्य घट्ने नभई धेरै मूल्यमा जग्गा बेचेपनि सरकारी मूल्याङ्कन अनुसारको मात्रै राजश्व तिर्ने चलनमा भने कडाइ हुने देखिएको छ ।

नयाँ नियम अनुसार चेक वा नगद जम्मा गर्दा अनिवार्य रुपमा विवरण खुलाउनुपर्ने र जग्गाको किनबेच भएको वास्तविक मूल्य देखाउनुपर्ने भएपछि सरकारी राजश्व बढ्ने देखिएको हो ।

यसअघि धेरै मूल्यमा जग्गा बेचेपनि सरकारी मूल्याङ्कन अनुसारको मात्रै राजश्व तिर्ने चलन थियो । अब भने त्यसरी सरकारलाई ठग्न अलि कठिन हुने देखिएको छ ।

जग्गा कारोबारमा मन्दी छाएको बेला मूल्य घट्ने हल्लाले दु:ख गरेर केही पैसा घर घडेरीमा लगानी गरेका निम्न वर्गीय मानिसहरूलाई चिन्तित बनाएको छ।

यस्तो हल्लाले जग्गा कारोबारीहरूले अनुचित फाइदा उठाउने र सोझा सिधा जनता भ्रममा पर्ने सम्भावना बढ्छ ।