मुक्तिनाथ विकास बैंकका आकर्षक २ कर्जा योजना सार्वजनिक

मुक्तिनाथ विकास बैंकले आकर्षक ब्याजसहितका दुई नयाँ कर्जा योजना सार्वजनिक गरेको छ । बैंकले ‘मुक्तिनाथ घर पुँजी कर्जा’ र ‘मुक्तिनाथ सरल व्यावसायिक कर्जा’ नामक कर्जा योजना सार्वजनिक गरेको हो ।

बैंकले आवासीय प्रयोजनका लागि आफ्नो वा एकाघर सदस्यको स्वामित्वमा रहेको घर, घडेरी तथा फ्ल्याट/अपार्टमेन्टमा भएको स्व–लगानीमा ‘डेप्ट लिभरेज’ लिने गरी ‘इक्विटी फाइनान्सिङ’ गरिने र अन्य बैंक तथा वित्तीय संस्थाले लगानी गरेको कर्जालाई पुनः लगानी गर्न सकिने गरी ‘मुक्तिनाथ घर पुँजी कर्जा’ सञ्चालनमा ल्याएको हो ।

घर पुँजीकर्जा आकर्षक ब्याजदरमा १५ वर्षका लागि लिन सकिने बैंकले बताएको छ ।यसका साथै, बैंकले ‘मुक्तिनाथ सरल व्यावसायिक कर्जा’ पनि सञ्चालनमा ल्याएको छ ।

यो कर्जा विभिन्न व्यवसाय स्थापना गर्न, आधुनिकीकरण गर्न र साथै व्यवसायमा हाल भइरहेको पुँजीगत तथा चालू पुँजी स्व–लगानीमा ‘फाइनान्सियल लिभरेज’ लिने गरी उपलब्ध गराइने बैंकले जनाएको छ ।

बैंकका अनुसार यो कर्जा उद्योग, व्यापार एवं सेवामूलक संस्था व्यवसाय सञ्चालनका लागि आवश्यक पर्ने संरचना/पूर्वाधारमा लाग्ने पुँजीगत खर्चहरू परिपूर्ति र मौज्दात, आसामी, पेश्कीलगायत स्थायी प्रकृतिका चालू पुँजी आवश्यकता पूरा गर्न तथा दैनिक कार्य सञ्चालनका लागि आवश्यक पर्ने अन्य कार्यशील पुँजीका लागि प्रदान गरिनेछ ।

मुक्तिनाथ विकास बैंकले हाल ४२ जिल्लामा १३४ वटा शाखाहरूमार्फत ग्राहकका आवश्यकताबमोजिमका सबै प्रकारका बचत निक्षेप तथा कर्जा सेवाहरू प्रदान गर्दै आइरहेको छ ।

साथै, प्रविधिमा आधारित रही मोबाइल बैंकिङ, क्यूआर पेमेन्ट, एटीएम, अनलाइन बैंकिङलगायतका सेवाहरू पनि प्रदान गर्दै आइरहेको छ ।