पोखराको पामेमा बनाउँदै गरेकोे ड्याममा कार्कीनेटाका पौडेलको शव भेटियो

दुई सातादेखि पोखराको पामेबाट बेपक्ता भएका हरिप्रसाद पौडेल मृत अवस्थामा फेला परेका छन् ।

पर्वत फलेवार नगरपालिका कार्कीनेटा १ घर भइ हाल पोखरा महानगरपालिका वडानं २४ डाँडाखेत बस्दै आएका ३३ बर्षिय पौडेलको बिहिबार शव भेटिएको हो।

गोरुलाई औषघि किन्नका लागि फागुन २२ गते बजार गएका पौडेलको शव बेत्यानी (पामे खोला) मा बन्दै गरेको ड्याममा पुरिएको अवस्थामा भेटिएको आफन्त धनप्रसाद पौडेलले जानकारी दिए।

उनका अनुसार पोखरा महानगरपालिकाले फेवातालको सिरानामा बनाउदै गरेको सिल्टेसन ड्यामको बनाउँदै गरेको पोखरामा ढुङ्गा, गिटीले पुरिएको अवस्थामा पौडेलको शव फेला परेको हो।

गोरुलाई औषधी किन्न भनेर बजार गएका पौडेल घर नफर्किए पछि २३ गते उनका परिवारले प्रहरीलाई मौखिक जानकारी दिएका थिए ।तर,लामो समय बितिसक्दा समेत कुनै जानकारी नपाएपछि फागुन २६ गते उनी हराएको भन्दै परिवारले खोजी गरिदिन भन्दै वडाप्रहरी कार्यलय बैदाममा लिखित निवेदन दिएका थिए ।

२ सय रुपैयाँ लिएर गोरुलाई औषधि किन्नका लागि बजार गएका पौडेल सिल्टेसन ड्याम भन्दा माथिको बाटो हुदै घर फर्कने क्रममा ड्यामको पोखरीमा खसेको हुन सक्ने प्रहरीको अनुमान छ ।

ड्याम भन्दा माथिल्लो किनारामा उनको ज्याकेट, मोबाइल र गोरुका लागि ल्याएको औषधि लगायतका सामग्री भेटिए पछि ड्याममा खसेको आशंकामा खोजी कार्य शुरु गरेको प्रहरीले जनाएको छ ।

घर फर्कने क्रममा साझँ झिरबाट लडेर ड्याममा खसेको र भोली पल्ट स्काभेटरले ढुङगा गिटीले निकाल्ने क्रममा पुरिएको हुन सक्ने प्रहरीको अनुमान छ ।

पौडेलको शवलाई पोष्टमार्टका लागि पश्चिमाञ्चल क्षेत्रिय अस्पतालमा राखीको छ । घटनाका वारेमा थप अनुसन्धान भईरहको प्रहरीले जनाएको छ ।